Shillong, Nailur, 20: Ka All India Trinamool Congress (AITC) kaba shong ha ka Liang Pyrshah ka la takraiñ tyngeh ïa ka Sorkar Meghalaya Democratic Alliance ba la ïalam da ka ka National People’s Party halor ka jingbym lah ban pynshitom ha kaba ïadei bad ka jingkynnoh ‘donkti be-aiñ’ hapdeng ki Kontraktor ba shimti ban tei ïa ka Ïingdorbar Thawaiñ ba thymmai hadien ka jingkhyllem jong u tnum pyllun ha u bnai Jymmang mynta u snem.
Ha ka shithi ba la phah sha u Myntri ka tnat PWD (Buildings) u Bah Dasakhiat Lamare, u National Spokesperson jong ka AITC u Saket S Gokhale u la ong kane ka jingjia ka pynpaw shai ba kam don tang ka jingdkoh hynrei ka jingpyrshang ban shukor ïa ka Sorkar bad ïa ki paidbah ka jylla Meghalaya da kaba ïasuh buit hapdeng ki Kontraktor kaba paw shai ba ka don ka jingpynkheiñ ïa ki kyndon.
“Kaba kham pynkyndit shuh shuh ka long ba ka Sorkor Meghalaya ym tangba ka la phiel ban ïada ïa kane ka jingïasuhbuit sop sop hynrei kam shym la pynshitom lane ban thung da ka jingtohkit ban lap ïa ka jingïasylla hapdeng ka Uttar Pradesh Rajkiya Nirman Nigam Ltd, ka Badri Rai and Company, bad ka Shiva Enterprises ban lap ïa ka daw,” u la ong.
U Gokhale u la kyrpad ïa u Myntri ban pynpaw da kaba shai la ka don neem ka jingpynshitom ha kaba ïadei bad kane bad ong, “ka jingkhyllem jong u tnum pyllun ka Ïingdorbar Thawaiñ ka la wanrah ïa ka jingduhnong shikatdei kaba paw shai ba ka dei ka jingïasylla kaba long be-aiñ.”
Haba kdew katkum ki khubor ba la paw ha ki lad pathai khubor, une u nongïalam ka AITC u la ong, ka paw ba ka Sorkar Meghalaya ka ïai bteng ban pynneh u juh u Kontraktor wat hadien ba la aiti ïa ka kaiphod da ka IIT-Guwahati.
“Kane ka paw shai ba ka jingïasylla sha lyndet kaba dang ïai bteng bad ki paidbah ka jylla Meghalaya ki donkam ban ïoh ïa ka jubab. Ngi dang ap ba phin ai ïa ka jubab kham kloi halor kane,” la ong u Gokhale ha ka shithi.
Katba ha ka jubab RTI ka pynpaw ba ka Uttar Pradesh Rajkiya Nirman Nigam Ltd ka la aiti pateng ïa ka kam ban tei ïa ka Ïingdorbar Thawaiñ ba thymmai sha ka ki ar tylli ki Contractors ba la shah kyntait, kata, sha ka Badri Rai and Company bad sha ka Shiva Enterprise, ong u Gokhale.
“Ka pynkynkulmar jingmut ban ïohi ba ka Sorkar Meghalaya bad ka tnat PWD (Buildings) ka shah ïa ka Uttar Pradesh Rajkiya Nirman Nigam Ltd ban aiwai pateng ïa ka jingtrei sha ki ar ngut ki Kontraktor kiba ka Tender ki la shah kyntait,” u la ong.
Ha kane ka shithi, u Gokhale u la buh jingkylli ruh ïa ka tnat PWD (Buildings) la ka tip neem ba ka Uttar Pradesh Rajkiya Nirman Nigam Ltd ka aiwai pateng ïa ka jingtrei ban shna ïa ka Ingdorbar Thawaiñ ba thymmai sha ki artylli ki Kontraktor ba la shah kyntait?
“Hato ka don neem ka jingshim jingkheiñ bad ka jingleit sorjamin ha ka por ba la tei ïa ka Ingdorbar Thawaiñ ba thymmai da ka tnat PWD (Buildings) ban eksamin kiei ki kontraktor ba la pyntrei ïa kane ka ing?’ la buh jingkylli shuh shuh u Gokhale.
U la ong ruh, hadien ba ka IIT-Guwahati ka ladep aiti ïa ka kaiphod halor ka jingkhyllem ka tnum pyllun jong ka Ingdorbar Thawaiñ ba thymmai , hato ka tnat PWD (Buildings) ka la buh jingkylli neem ïa ka Uttar Pradesh Rajkiya Nirman Nigam Ltd. halor kano ka nongrim ba ka aiwai kylla ïa kane ka kam sha ki Kontraktor ba ladep shah kyntait.
