Shillong, Nailur, 20: Ka seng jong ki nongtrei ka NEHU kaba la tip kum ka NEHUNSA ka la rai mynta ka sngi ban pynlong da ka jingïakhih ba khlem buh por ha ka tnad ba peit ïa ka Examinination naduh ka Sngi Ba Ar ban pyrshah ïa ka jingthmu ban pynjlan biang ïa ka jingthung kontrak ïa u Office on Special Duty (OSD).
“ Ka lawei jong ki samla pule kane ka skul bah bad kumjuh ruh jong ki college kiba pynïasoh bad ka NEHU ka don ha ka jingkahdum lada dang ailad ïa une u OSD ba un dang bteng biang ïa ka kam. Kumta ha ka jingïalang kaba la long kyrpang mynta ka sngi la shim ïa ka rai ba ka tnad Examination kan sdang da ki jingïakhih ba khlem buh por naduh ka 20 tarik haduh ban da ïoh ïa ka jingdawa” ong ka kyrwoh na ka NEHUNSA.
Une u OSD ba mynta u dei uba la shongthait kum u Controller jong ka Examination naduh ka 31 tarik Nohprah 2020 hynrei la thung kontrak pat ïa u kum u OSD haduh mynta.
Halor kane ka jingïakhih ka seng ka la ong wat tang ban shon ïa ki Marksheet ruh ym lah ban leh namar ym don ki kotsada shon markshet. Halor kane la dep pyntip sha u OSD hynrei haduh mynta um shym leh ei ei bad ym lah satia ban shon ïa ki marksheet ki samla pule mynta la lai bnai lynter.
“ Ngi tip shai ba donkam da ki kot sada kiba kyrpang ban shong ïa kine ki Certificate kiba dei naduh ki Migration, Degree, Provisional etc na ka bynta kine ki samla pule kiba la dep pyndep ïa ki jingpule. Hynrei une u OSD um leh ei ei bad kiba bun ki printer ha ki Post Graduate Section bad Certificate Cell ki dei kiba la rim bha bad kiba bun ruh ki la sniew. Na ka liang u Ophisar ba dei peit ïa ka Purchase bad Store Section u la kylli ïoh donkam ban thied da ki mashin kiba thymmai hynrei une u OSD um ai jubab ei ei ruh em”.
Hooid ki samla pule ki donkam ruh ban shon ïaki thesis, transcript bad kiwei kiwei kiba ïaleh ïaki MPhil bad PhD hynrei kane ka tnad kam lah ban pynbiang ïaki kot ba donkam namar kam don pisa namar une u OSD u sngap man man beit wat haba ka tnad ka donkam pisa bad kiwei kiwei ki jingdonkam ruh.
“ Ngi la ïoh jingtip ruh ba ka jingdonkam ban pynbha bad pynthymmai ïaki Software, UG Computer Software, Upgradation of Server/Netword ym shym la leh mynta la lai snem kynthi. Kine ki long kiba donkam bha namar ka tnad Examination ka buh record ha kine ki database” ong ka seng.
