Ngam kwah ban ap haduh da dei ka por shongthait namar nga thrang ban shakri: Bah Ransom

Shillong, Nailur, 20: U kyrtong ka NPP na Shillong North Constituency, Bah Ransom Sutnga u la ong ba ka mynsiem ban shakri kam shah shuh ïa u ban ap haduh ban da dei ka por shongthait kaba dang sah ha kumba 6 snem ei ei.
“Ban shakri ïa ki paidbah bad ïa ka constituency ym donkam ban da ap haduh ban da la shongthait na ka kam. Dei na kane ka daw ba nga la shim ïa ka rai ban iehnoh ïa ka kam kum u Executive Engineer kaba dei ka rai kaba tyngeh bha na ka bynta ban ïaid shakhmat ïa ka kam,” la bynrap shuh shuh utei u rangbah haba kren bad ki lad pathai khubor.
U la kubur ruh ba ka Shillong North kadei ka constituency kaba bun ki samla kidei kiba la nang la stad hynrei ym ju don pat kiban kyrshan ne plie lad ïa ki ba kin ïaid shakhmat ha ka jingim jong ki. “Ym ju don satia ki jingbtin lynti ne coaching la ka long ha ka lain Medical, Engineering, Civil Services exam lane Staff Selection nga ïohi ba namar ki khynnah jongngi kim don ïa kine kabu kim lah ban ïa khun bad kiwei ki paralok,” u la ong da kaba kam ba lada ki paidbah ki ailad, mar ïa jop kine ki dei ki bynta ba hakhmat eh ban pyntreikam.
Nalorkine, u Bah Ransom u la ïathuh ba ha ka jingïaid jong u na kawei ka iing sha kawei pat u lap ba ki don bunbha ki longiing kiba donkam ïa ki jingïarap ba kyrpang. “Bun ki ong ba kane ka constituency kadei kaba dap ba biang hynrei lada phi leit shisha sha ki longiing phin shem ba kiba bun ki longiing ki donkam ïa ka jingkyrshan kaba pura ba kin lah ban ieng ha la ki jong ki kjat.”
U ong ruh ba kum u briew uba ju leit kylleng ki jaka u shem ba ka jingduk ha sor ka ïapher baklybak bad ka jingduk ha nongkyndong. Katkum ka jingong jong u kiba duk ha nongkyndong tang ïoh u khaw ki la hun, hynrei ha sor baroh la hap ban shu thied lut nalor sa ka siew bai wai iing.
“Lada phi peit ha ka roi ka pa kane ka constituency ka dang donkam bun bha, la ka long ka umbam umdih namar kat kane ka constituency kaba ki ong ba kadei ka jaidbynriew ym pat don ka jaka pynkhuid um lane ka water treatment plant kaba baroh ki khmih lynti ban ïoh ïa ka umbam umdih kaba khuid ba suba. “Lada ngi jop kane ruh kadei ka mat kaba donkam bha ban ïoh ïa ka umbam umdih kaba biang.”
Na ka liang utei u kyrtong u ong ruh ba u kwah ban ïohi ba ka khuid ka suba bad khamtam eh ka shongsuk shongsaiñ kan synshar ha ka thain baroh kawei.