Shillong,Nailur 20 : Ka High Level Committee kaba la thung ban bud dien halor ki jingkynnoh ba ka don ka jingtih dewiong beaiñ ha ka jylla Meghalaya ka pyni ba u dewiong uba pynïaid ha Meghalaya u dei uba wan na Assam.
ïa kane la pyntip sha ka ïing bishar High Court ka jylla na ka bynta ka Coal Controller halor ka mukotduma PIL ba la ujor da u Champer M Sangma.
Ka jingbishar halor kane ka mukotduma kan long pat ha ka 19 tarik Risaw 2022 hadien ba la pan por na ka ïing bishar.
La ai ïa ka kaiphod na ka bynta ka Coal Controller ba ïa ka High Level Committee la thung ban bishar bniah halor ki jingkynnoh ba ka jur ka jingtih dewiong beaiñ ha Meghalaya. Hynrei ha ka kaiphod la kdew ba une u dewiong u dei uba wan na Assam da kaba leh thok ïa ki kot ki sla ban khaïi sha ki ri ba marjan, ong ka hukum ba la pynmih da ka ïing bishar mynta ka sngi.
