Shillong, Nailur 19: U Myntri ka tnad PHE jong ka sorkar u Bah Renikton Lyngdoh Tongkhar ha ka sngi Nyngkong u la pynpaw ba ka jingslem ban pyntrei ïa ka skhim Jal Jeevan Mission(JJM) ha ka jylla ka dei na ka daw ka ji gtyrkhong kynsan ne ka jingrit ka tyllong um kaba la dep ban survey na bynta ban tan um ban pynpoi sha ki thliew ïing.
U Bah Renik u la ïathuh ba kiba bun ki shnong ki la ïoh ïa ka tyllong um bad na ka liang ka tnad ruh ka la dep ban jurip ki jaka(survey) bad phah ka jingtyrwa ban mang ruh ïa ka jinglut ban tan um hynrei u ong ba kynsan kynsan katba dang pyntrei ïa ka skhim kine ki tyllongum ki rngad ne rit haduh ba ym long shuh ban tan um.
U la ïathuh ruh ba na ka liang jong u u la phah ka shithi sha ka Tnat Jal Shakti ban ïarap da ka song pisa sha ka tnad PHE ka sorkar jyla ba kan lah ban shim ïa ki jaka ba don sawdong ka tyllong um namar kane ka dei tang ka lynti ban ïada ïa ka jingtyrkhong noh ki tyllong um ha kylleng ka jylla.
“Tang lada ngi ïoh ïa kine ki jaka ngin lah ban ïada na ka jingtyrkhong um da kaba ngin thung dieng bad adong ban don kano kano ka jingkyntur ki briew sha ka tyllong um” u la ong.
U la ong ba na ka liang ka tnad ka la phah ban wad thymmai da ki tyllong um na ki jaka ba pajih makna ruh lada ka lah pat ban pyndap um kat kum ka jigdonkam. “Lada hap tan um na ki tylong um ba kham jngai ban ïa kaba la dep mang phi sngewthuh ba ka jinglut ka la tam da ki bun shah” u la bynrap.
U la ong ruh ba sa kawei ka jingeh ka dei namar ka ki tyllong um ki jngai palat bad kane ka daw ka kham shim por ban pyndep ïa ka jingtrei, u la pyntip.
Haba jubab halor ka jingpyntrei ïa ka JJM u la ïathuh ba haduh mynta la pyndep haduh kumba 40% bad u la ong ba na ka liang ka tnad ka buh thong ba la kumno kumno kan kynjoh 50% ha ba kut une u bnai bad u la bynrap ba na ka 5400 klur ba la mang la dep pyllut kumba 1400 haduh 1500 klur ha ka jingpyntrei ïa kane ka skhim.
