Shillong, Nailur 20 : Ban pynphuh ïa ka jingrakhe dap 100 snem ka jingwan u Don Bosco ha India, na ka liang ka Assam Don Bosco University kan pynlong da ka tamasa ïalehkai phutbol 5-Aside ba tip kum ka North East Pride Cup ha ki san tylli ki distrik jong ka jylla nalor kiwei kiwei ki nongbah ha ka thain shatei lam mihngi jong ka Ri.
Ha Meghalaya ïa katei ka jingïalehkai yn pynlong ha Shillong ha ka 24 bad 25tarik mynta u bnai ha Assam Rifles Football Ground, Laitor nangta ha ka 29 bad 30 tarik ha Madan Mawlum, Pyndengumiong, Mairang.
“Ha katei ka jingïalehkai kin don haduh 20 tylli ki nongbah na kylleng ki jylla jong ka thain shatei lam mihngi ka Ri kiban shim bynta ban ïa knieh ïa ka khusnam kaba 3lak tyngka,” ong u Abhijeet Oberoi CEO ka Genesis Max Foundation ka kynhun kaba snohkti lang bad katei ka skulbah ban pynlong ïa katei ka jingïalehkai.
La pyntip ruh ba ki nongshim bynta kin dei tang na ka bynta kiba 14 snem, 16 snem bad 19 snem ka rta. Shuh shuh u la pyntip ruh ba rukom pynlong ïa katei ka jingïalehkai kan dei beit mar san ngut shilliang shilliang.
Nalorkata u pyntip ba ka kynhun kaba ïoh ban khur ïa ka nam lahduh maman la ki jingïakhun kata ha ka thup ba hapoh 14 snem, hapoh 16 snem bad hapoh 19 snem kin ïoh ban mihkhmat pat sha ka jingïakhun kaba kham heh ne ka zonal finale kaban long ha Guwahati.
U CEO u ïathuh ruh ba katei ka jingïalehkai kan dei beit tang ban plie lad ïa ki khynnah ba kin ïoh mih madan bad kam pat don kano kano ka jingpynkhreh ban jied ïa ki nongïalehkai kiba tbit.
“Hynrei ïa kane ngin sa peit hadien ynda la poi sha ka zone finale lada i donkam,” u la ong.
