Shillong, Nailur 19: Kawei ka Booth Level Officer (BLO) jong ka South Shillong Constituency kaba la tip kyrteng kum ka Kong Banrikynti Ryntathiang ha ka sngi Nyngkong ka la leit ban ujor da ka ejahar pyrshah ïa ki shitnga u Amir Nongbri bad ka Renu Rymbai sha ka ophis u SP ha ryngkat ka jingsynran lang ki para BLO namar ka jingshah thad pynkhlemraiñ lyngba ki rynsan Social Media kaba ki la kynnoh ba ka dei kadei ka riewthok riewshukor.
Ha ka jingïalang kaba la pynlong ha Assam Club, ka Kong Barikynti ka la ïathuh ba kane ka jingshah thad pynkhlemraiñ jongka lyngba ka social media ka dei na ka jingpyndep hok la ka kamgram ha kaba ka la leit ban rung ïing kumba ju leh ban leit pan jingtip ïa ki nongthep Vote kiba kwah pynïasnoh ïa ki Aadhar bad ki Pan Card bad ka EPIC kumba la ai lad ka Election Commission of India.
“Dei ynda rung ha kawei ka ïing kaba don ha Laban Thranghok Road, katei ka trai jong katei ka iing ka Renu Rymbai ka la shon dur khlem ka jingtip bad ka jingai jingbit jong nga bad ka la pynsaphriang sha ki rynsan social media ryngkat ka jingthoh kaba ong ïa nga, don ka briew kaba leit rung briew bad kam ïalade ba kadei na ka Election commission of India sngewbha ïa husiar.” ong ka Kong Barikynti
Ka la ong ruh ba ka Renu ka la kam ruh ba u tnga jong ka u dei uba trei ha SP ophis bad ka la shu shon dur ïa ka Kong Barikynti ban pynsaphriang ha Whatsapp da ka jingïarap lem jong u tnga jong ka.
Ka Kong Barikynti ka la ïathuh ba ka dap da ka jingsngewlyngngoh bad lehraiñ ban ïohi ba ïa ka dur jong ka ba la shah thad naduh ka 16 tarik Nailur bad kaba long ka jingïalam bakla, watla ka trei hok ïa la kamram. Kumta mynta ka sngi ka la leit ban ai ejahar ha ryngkat ka jingsynran kiwei ki BLO.
Shuh hadien ba ki la dep ban ujor ejahar ki la leit ban kynduh bad ka DC ban ïakren ïa kane ka jingshah pynkhlemraiñ jong ka bad ban kyrpad ba ka DC kan shim da ki lynti ai jingpynsaja ïa kine ki shitnga bad ruh ka la leit ban buh jingthoh ha ka ophis u Chief Election Officer ka jylla ba un leh ïa kaba donkam.
Haba kren sha ki lad pathai khubor, ka Kong Banrikynti ka la ïathuh ba na ka liang ka DC ka la kular ban shim khia ïa kane ka kam.
Ka la ong ruh ba kumba kine ki shitnga ki la pynjah burom bad pynkhlemraiñ ha ki rynsan social media ki dei ruh ban wan panmap ïa ka lyngba ki lad pathai khubor.
