Shillong, Nailur 19 : U MLA ka HSPDP ba dei ruh u Myntri ha ka sorkar jylla Bah Renikton L Tongkhar ha ka sngi Nyngkong u la kyntu ia baroh ki seng sainpyrthei ba kin kiar ban leh politik halor ka Ishu khappud.
“Ngim dei satia ban leh politik halor kane ka kam ngi dei ruh ban kmen ia kaei kaba ngi ioh bad kaba ngi la lah,” la bynrap biang u Bah Renik.
Katei ka jingkren jong u kadei halor ka jingkren ki nongialam ka Congress ba lada ki wan biang ha ka bor ha u 2023 kin sa bishar biang ia ka soskular pynbeit pud ba ka sorkar Meghalaya ka soi bad ka Assam ban pynbeit ia u pud u sam ha ki hynriew tylli ki jaka.
Dang shen ka All India Trinamool Congress ruh ka la kam ba kan phaidien biang ia katei ka Ishu pynbeit pud lada ki wan ha ka bor.
U Bah Renik uba dei ruh u chairman jong ka Regional Committee ha ka kylla ba nyngkong jong ka jingkren pynbeit pud u la ong ba lada ki paidbah ha khappud ki dang mad ia ki jingeh ym don satia ba lah ban khang ia ki ban iakhih.
“Hynrei na bynta kito ki jaka ba ki paidbah ki hun bad ka MoU nga kwah ba ym dei satia mano mano ruh ban leit thaw jingkulmar,” u la ong da kaba bynrap ba ha ka jaka ban phaidien biang ia ka MoU la dei ban wad ia ka daw bad pynbeit ia ka jingeh jong kato ka shnong ba mih ka jingeh.
U ong ruh ba kaei ka rai ba la mynjur da ki ar sorkar dei ban burom ia ka.
Da kaba Ïaroh ia ka sorkar MDA kaba la lah ban pynbeit pud ha kylla ba nyngkong u Myntri u ong ruh ba dalade hi u lap ba kane ka sorkar ka la leh ia kaba bha tam kaba u shim ba kadei ka kam kaba khraw bha.
