Shillong, Nailur 19: Ka Khasi Students Union (KSU) ha ka sngi Nyngkong ka la pynrem jur ïa ki paid Karbi kiba shong ba sah ha ki shnong kiba don marsyndah bad ki shnong Khasi ha ki thaiñ Block I namar ka jingpyntieng pynsyier, byrngem byrsit bad pynthud ïa ka shong suk shong saiñ jong ki Khasi kiba shong ba sah ha kine ki thaiñ Block I.
“Ngi kren da kaba shai sha ki paid Karbi ba ki dei ban sahngeh shisyndon ka jingpyntieng pynsyier, byrngem byrsit bad pynthud ïa ka shong suk shong saiñ jong ki Khasi kiba shong ba sah ha kine ki thaiñ Block I namar kane ka lah ban wanrah ïa ka jingïaumsnam ha kane ka thaiñ” ong u Samla Laitphar Syngkrem u, President ka KSU West Jaintia Hills.
“Ka KSU kan ym shong kli kti ban shu long nongpeitkai lada ki bteng ban pyndik ïa ki doh ki snam jong ngi bad na ka liang ka seng kan leh ruh da kaba tyngeh ban ai jingïada bad jingshngaiñ ïa ki para doh para snam” u la bynrap.
U Secretary ka KSU West Jaintia Hill District, u Samla Lenning Grad Tariang u la bynrap ba kane ka jingshah pyndik barabor ka wan hi na ki Pulit Assam ha kaba lada ki ot tang u phlang sop iimng, pom tang ka dieng ban shna ïing ne tih maw tih shyiap na bynta ban shna jingshna ki Khasi kin hap ban siew khajna beit sha ki pulit Assam.
Shuh shuh u la ong ruh ba lada ki Khasi kiba rep ki leit sha ki ïew ki hat ban die la ki marrep ki Pulit Assam kin oh khajna beit 300 ne 400 shisien leit bad u la ïathuh ruh ba na ka liang ki Pulit Assam ki maham tyngeh ba ki Khasi kin leit sha ki jingïakynduhlang ki Khasi ne kino kino ki jingïalang bad lada leit shim bynta ki puliyt Assam ki lah ban tan phatot ïa ki bad ki Karbi ki ju byrngem wat ban pynïap ruh.
U la ïathuh ruh ba bunsien ki piad Khasi ki mad ka jingshah thang ki ïing ha ki jaka rep bad wat ki lyngkha ruh ki shah thang ha ki Karbi.
U la ong ruh ba na ka sorkar ka dei ban peit kyrpang ïa ka jingdonkam jong kane ka shnong namar ki dang bun ki jingdonkam kiba ki nongshong shnong jong ki 36 tylli ki shnong Khasi ki dang donkam.
“Ki thanat pulit na kine ki thaiñ ruh ki jngai bha bad teng khat eh ruh ba ki pulit kin poi sha kine ki thaiñ nalor ba ka surok ruh ka dang dei tang ka surok khlaw namar kata ka donkam eh ruh ba kan buh ktem Pulit noh ban ai jingïada ïa ki Khasi jong kane ka thaiñ” u la ong.
U la ïathuh ba kine ki 36 tylli ki shong ba donb ha ka Block I ki hap ha ki lai tylli ki Ilaka kata ka Raliang, Nabang-Nongphyllut bad ka Pangam.
Shuh shuh u la ong ruh ba ka Nabang Nongphyllut kadei kaba dang shu ïoh biang ïa ka jinglong Ilaka dang shen ha kaba ka JHADC ka la thung tang u Acting Doloi khlem pat da aiSanat bad na ka liang ka KSU ka la kyntu ruh ïa ka JHADC ban ai noh ka Sanat ba un lah ban register ki jaka puta na bynta ban skhem ka jinglongtrai ïa ka khyndew ka shyiap.
