Shillong,Nailur 19 : Ka HANM ka la kyntu ïa ka sorkar jylla ba kan ailad noh ba ka jingthoh eksam ne ki interview kam dei ban long noh ha ka Ktien Khasi ne Garo na ka bynta ki nongshong shnong ka jylla.
“Lada ïa ki nongmihkhmat ka jylla la shah ba kin kren da Ktien lajong ha Ïing Dorbar, kumta la dei ban ailad noh ba ïa ki eksam kam ne interview dei ban pynlong ha ka Ktien Khasi bad Garo,” ong u President ka HANM Sengkmie, Bah Lamphrang Kharbani haba kren bad ki lad pathai khubor.
Katkum ka jingong jong u, lada ki trai shnong ka jylla hi kim sdang bad pyni da ki kam lehse ka jingïakhun ban pynrung noh ïa ka Ktien Khasi bad Garo kan ym seisoh lano lano ruh ha ka Khyrnit kaba Phra.
Na ka liang ka Seng u ong ruh kum shi bynta ban buddien lang ïa katei ka kam, ha ka 16tarik ka la leit ban kynduh ïa u Chief Secretary ka Jylla Bah DP Wahlang ban kyntu ba un ïa kren lang bad ka sorkar pdeng ban kyntu ïa ki bor pynïaid jong ka Central Board of School Education ba kin ailad ïa ki khynnah ba kin thoh ïa ka eksam da ka Ktien Khasi bad Garo kum kawei na ki sobjek kumba leh ka ICSE bad ISC.
“Ka Seng ka la kyrpad ïa utei u Ophisar Rangbah ban ïakren bad ka tnad pule puthi ka Sorkar Pdeng bad ruh ïa ka CBsE ba kin ailad ban thoh eksam da ka Ktien Khasi bad Garo,” u la ong da kaba pynpaw ba wat na ka liang u Chief Secretary ruh u ïahap bha ïa ka jingdawa jong ki.
Kawei pat ka bynta ba ka HANM ka buh ka long ba baroh kito ki riewlum kiba ïoh syrnod Scheduled Tribe ba ki dei ban thoh beit da ka Ktien Khasi bad Garo kum kawei na ki sobjek ha ka Meghalaya Board of School Education.
