Shillong, Nailur 19 : Ka Kong Kmoiñ Wahlang kaba la don mynta 74 snem ka rta hynrei watla ha katei ka rta jinglong tymmen ka dang khlaiñ ban ïatyntjuh bor bad ki nongïalehkai kiba dang samla ha ka jingïakop ïamareh marathon.
Ka Kong Kmoiñ Wahlang ka la paw pyrthei biang ha ka ïakop mareh kaba la long ha ka sngi Saitjaiñ ka Mawlynnong Runsafari 2022, ha kaba ha katei ka jingïakop mareh ka la ïoh khur ar tylli ki trophy bad ar tylli ki takma da kaba jop ha ka kyrdan kaba saw ha baroh ki kyrdan ïakop mareh bad ka la ïoh ka khusnam kum ka nongmareh kaba la tymmen tam.
Kadei ruh ka sien kaba 20 ba ka Kong Kmoiñ Wahlang ka la ïashim bynta ha ki jingïakop ïamareh la kynthup hapoh la ka jong ka jylla bad ha ka ri India hi baroh kawei.
Ka Kong Kmoiñ watla ka la ai mynsiem ïa ki nongïamareh kiba dang samla ba kidei ban trei shitom da kaba ong ba kano kano ka jingtrei shitom kam don jingeh ban khanglad ban poi sha ka thong bad kyntu ruh ba kin dang bteng ban ïashim bynta ha ki jingïakop ïamareh kumba ma ka watla hapdeng ka rta jnglong tymmen hynrei ka dang mih shakhmat.
Ka Kong Kmoiñ Wahlang kadei na ka thaiñ Mawkyrwat jong ka South West Khasi Hills District bad ka don 12 ngut ki khun, 45 ngut ki khun ksiew bad 3 ngut ki khun miaw.
Ka Kong Kmoiñ Wahlang ka don ka jingpang gastric bad na ka liang ki doktor ki la ai jingmut ba kan leh ki jingkilan met namar dei tang kata kaba lah ban pynkoit ïa katei ka jingpang. Ka la sdang ban ïashim bynta ha ki jingïakop mareh ha u snem 2018 bad kala sdang ban mareh marathon ha ka sien kaba nyngkong ha Mawsynram.
Ka Kong Kmoiñ ka la ïoh bteng ban ïashim bynta ha ki jingïakop ïa mareh da ka jingai mynsiem ki khun bad ki paralok ha kaba ka la ïashim bynta hapoh ka jylla wat shabar jylla ruh kumjuh. Ka Kong Kmoiñ Wahlang ka la ïashim bynta ruh ha ka Mumbai Marathon ha u snem 2019 ha ka jingïakop mareh ba 45km kaba dei ka jingïakop ïamareh kaba jngai tam.
Watla ka Kong Kmoiñ Wahlang ka la mihkhmat ïa ka jylla ha kiba bun ki jingïakop ïamareh hynrei ka la ïathuh ba kam shym la ïoh ka jingkyrshan ba pura na ka sorkar jylla.
Na ka liang u Uttam Dhar na ka Real Sports India u la ïathuh ba ïa katei ka RUNSAFARI 2022 la pynlong shi bynta ban kyntiew ïa ki kam jngohkai pyrthei ha Mawlynnong bad ruh ïa ka jingkhaïi hapdeng ki shnong khappud bad ka Bangladesh bad ban ai mynsiem ïa ki samla ba kin kiar na u drok.
La pynlong ïa ka Mawlynnong RUNSAFARI 2022 ha ryngkat ka jingïatreilang ryngkat ka tnad Tourism, Social Welfare, DC East Khasi Hills District, SDO (Civil) Pynursla, Shillong Press Club bad ka Dorbar Shnong Mawlynnong, Nohwet, Rewai, bad ka shnong Nongeitniang.
