Ka sorkar ka dei ban sei madan ïa ka soskular ïa pynbeit pud sawa ka Sur ki Paidbah

Shillong, Lber 30 : Shi sngi hadien ba ka sorkar jylla Meghalaya ka la dep ban ïasoi ïa ka soskular ïa pynbeit pud bad ka sorkar Assam hakhmat u Myntri Kam Pohïing ka ri u Amit Shah, na ka liang u Mawphor ula ïoh ban ïakren bad swar jingmut na kiba bun ki riew khraw pyrkhat, ki riew pawkhmat, ki riew paidbah, ki nongshong ïew, ki nongñiah kali, ki paid khappud bad wat bad ki MLA bad ki Myntri Sorkar hi ruh kumno ki sngew halor kane ka soskular ïa pynbeit pud ki ar jylla bad ka Sur kaba mih na kine baroh ka long ba ka sorkar ka dei ban sei madan noh mynta ïa ka soskular ba la dep ïasoi khnang ba ki paidbah kin ïashai kdar bad lait ban sah ha ka umdum.
Namar ba la bun kiba ïakren kumta ym lah ban jer kyrteng iwei hadien iwei hynrei la shu thoh kyllum beit ïa kaei ka jingsngew jongki. Kitei ki kynhun kiba la ïakren bad u nongthoh khubor jong u Mawphor lyngba ka phone bad markhmat ruh ki pynpaw ïa kajuh beit ka sur. “ Baroh shi katta ym don ba tip kumno kata ka jingïapynbeit pud kan long bad la ïohi ba ki paidbah ha khappud ki khih lynga bad pisa namar ki shu bna na ki khubor hamsaia ba ki la shah pynngat sha Assam. Hynrei mynta ba la dep ïasoi ka sorkar ka dei beit ban sei madan khnang ban shai ki paidbah bad lada donkam ban dan ïakren pynbeit ruh ban ïoh ïakren katba dang biang ka por shwa ban sdang ka jingjurip pud da ka Survey of India”.
Uwei na ki Myntri Sorkar u bym kwah ban pynpaw kyrteng ïalade u la ong “ Na ka liang jong nga ngan leit dawa ban ïakren hi bad u Myntri Rangbah u Conrad K Sangma ba u dei ban pynmih paidbah ne sei madan ïa kane ka kaiphod khnang ba ki paidbah kin shai, kin hun bad kin ym sah ha ka umdum. Namar kumba ka long mynta ym tip shisha kumno kata ka jingïapynbeit pud kan long la kan pynhun ne em ïa ki paid khappud kiba la im la san bad don ha Meghalaya baroh shi katta”.
Ki riewkhraw pyrkhat, ki heh khlieh, ki Nonghikai bad ki riew paidbah ki ong “ Hooid shi rukom ngi sngewkmen ba la lah ban pyniaid shakhmat ïa jingpynbeit ïa kane ka kam ba sahteng mynta la sanphew snem, hynrei ngim shai pat kumno kata ka jingïapynbeit ka long namar shwa ban leit rah sha Delhi la dei shwa ban sei madan da kaba buh ha ki Website jongka sorkar jylla khnang ba ki paidbah, ki riew khraw pyrkhat bad ki nongmihkhmat paidbah kin ïoh ban ïa ai jingmut shwa ban pynkhreh ïa kata ka kaiphod kaba khatduh ban leit rah sha Delhi. Ban da dei ba buh shwa ha Website wat ki paid khappud ruh ki la ïohi bad ki la lah ban ïa ai jingmut. Hynrei mynta i kumba la shu leh kyrkieh palat ïa ka kam namar tang hapoh ki hynriew bad hynñiew bnai la pyndep ïa ka jingpynbeit pud. Nalor kata kumba ka paw ha ki lad pathai khubor man la ka sngi la ïohi ba ki paid khappud kim don jinghun bad ki sngew pyrshah jur namar ki shu bna na ki khubor hamsaia ba ki la shah pynhap sha ka Assam. Kumta khnang ban lait na kino kino ki jingkulmar hadien habud ka sorkar ka dei ban pynmih paidbah ne sei madan beit ïa ka soskular ba la ïasoi ha ka 29 tarik Lber 2022 ha nongbah Delhi hapdeng u Myntri Rangbah ka jylla u Conrad K Sangma, u Myntri Rangbah ka Assam u Himanta Biswa Sarma hakhmat u Myntri Kam pohïing ka ri u Amit Shah”.
Kumjuh ruh na ka liang ki nongshong ïew, ki nongñiah kali, ki paid khappud “ Ki pynpaw ia kajuh ka sur tangba ki ong lada ka biang ka jingïapynbeit pud kan long ka jingkmen kaba khraw hynrei lada jia ba ka sorkar MDA ka leh bakla bad pynsngewsih ïa ki paidbah kynmaw ïoh ka kyrtoh kylla ïa kane ka sorkar ha ka Election MLA 2023. Lada ngi ki paid khappud ngim hun, ngin ym shong kli kti hynrei ngin pynlong da ka jingïakhih paidbah kaba tyngeh da kaba ïatrei lang bad baroh kito ki hynriew tylli ki jaka ba la shah ktah ha ka jingïapynbeit pud”.