Ïakynduh ka KSU ïa u CM ban pynbun ki tnad treikam, u kular tang ka Election bad Supply

Nongstoiñ, Nailur 18: Ka KSU Mawshynrut hapoh ka jingïalam jong u Samla Armstrong Sohshang President bad Samla Ulysis Ryntong General Secretary lem bad ki katto katne ki dkhot, ha ryngkat ka jingsynranlang ki nongïalam jong ka KSU Sengkmie lem bad u Bah Gigur Marthong MLA/MDC, ki la ïoh ban ïakynduh ïa u Conrad K Sangma Myntri Rangbah ka Sorkar jylla ha ka sngi thohdieng, ban dawa pynïar bad pynbun ïa ki department bapher bapher ha ka Mawshynrut Civil Sub division.
Ha katei ka jingïakren bad u Myntri Rangbah, ka seng ka la ïoh ban pynpaw ba haduh mynta ka Mawshynrut Sub Division ka dang long kumjuh, wat ka main office ruh kam pat don la ka jong ka building, hynrei dang hap ban shu wai ïing briew.
Nalor nangta haduh mynta bun na ki kam office, ki paitbah ka thaiñ kin dang hap ban kiew sha Nongstoiñ namar ka jingduna ki branch ha Civil Sub division bad ki department bapher bapher ba dei ban don. Kane ka buh jingeh shibun ïa ki paitbah ka thaiñ khamtam na ki thaiñ kham sha kyndong.
Shuh shuh ki Nongïalam ka seng ki la ban jur ïa u Myntri Rangbah ba u dei ban phaidien sha ka Mawshynrut Civil Sub division, namar ka dang don shibun ki jingduna ha jan baroh ki liang. Ki Nongïalam ka seng ki la ong ba la thew ïa ka jingdon briew ka la khambun ban ïa katto katne ki District, katba ka jingtreikam hapoh Mawshynrut Civil Sub division ka dang neh hajuh namar ka jingleh klet ka sorkar ki la ong.
Ki mat ba ka seng ka la pynsngew sha u Myntri Rangbah ki long ka jingdonkam ban don noh ka Development Branch, Election Branch, Supply Branch, Public Health Engineering (PHE) Department, Office jong u Sub-division of School DSEO, Labour Department, Metrological Department, VIP Gallery ha Riangdo bad kiwei kiwei.
Ka jingïakynduh bad u myntri rangbah ka jylla kam shym la pynhun ïa ka seng, namar na ki 8 tylli ki mat jingdawa u la kular ban pyntrei kam shwa tang ar tylli. Ki department ki long ka election branch bad supply branch. Katba ïa kiwei pat ki tnad treikam um shym la kren ei ei, u la shu ong ban pynurlong noh ïa ka VIP gallery hapoh Riangdo.