Pynliem ki Ophisar ïa ki Pastor ha ka jingïalehkai phutbol paralok

Nongpoh, Nailur 18 : Ka kynhun ïalehkai jong ki ophisar sorkar ryngkat bad ki MLA, MDC jong ka Ri Bhoi mynta ka sngi kila pynliem noh ïa ki Pastor jong ka KJP Synod Sepngi haka jingïalehkai phutbol paralok (Charitable Football Friendly Match) ha madan Umroi, bala pynlong da ka Jingïaseng Syllok ki Pastor KJP Synod Sepngi, Ri-Bhoi Zone shibynta ban pynmih pisa na ka bynta ka jingrakhe dap 100 snem jong ka Dr. H Gordon Roberts Hospital ban tei ïaka building thymmai bad ban pynheh shuh shuh ïa katei kawei naki jaka sumar ba paw haka jylla.
Da ki hajar ngut ki paidbah na kylleng ki jaka kila wan ban sakhi ïa katei ka jingïalehkai phutbol paralok bala pynlong ïaka madan Umroi ban dap smam da ka jingrisa bad kynhoi jong ki paidbah naka jingshim bynta ki riew pawkhmat haka jylla naduh u Bah DP Wahlang Chief Secretary ka jylla, ki MLA ba kynthup ïa u Bah George B Lyngdoh MLA ka Umroi, Bah Mayral Born Syiem MLA ka Nongpoh, Jason S Mawlong MLA ka Umsning, Bah Charles Marngar MDC Mawhati, Bah R Kharbuki MDC Umroi bad ki ophisar naki tnad sorkar bapher bapher, ryngkat ki pastor naki Presbytery bapher bapher bad ha katei ka sngi u Rev IW Nongsiej Moderator ka KJP Synod Sepngi u la long kum u kongsan.
Haba phai sha ka jinglehkai ha katei ka sngi ka dei shisha ka jinglehkai kaba pynshongshit bad pyn samrkhie ïaki paidbah haka juh ka por, na ka jingai reng bad pyni sap ïalehkai hapdeng ki ophisar sorkar, ki MLA bad MDC pyrshah ïaki Pastor jong ka KJP Synod Sepngi bad hapdeng ka jingïakhun bajur ka kynhun ki ophisar kala ioh ban pynkhih nyngkong ïaka jar bad ioh ban thep haduh 2 kol jong ka kylla step haduh ba u MDC ka Mawhati u Bah Charles Marngar u la ioh syndon da ka Yellow Card kaba la pynrisa bad pynshongshit ïaki paidbah hadien ba u la phong tang shilliang ka juti ban lehkai ha madan.
Haba phai sha ka kylla miet ka kynhun ki Pastor kila pyrshang ban ïakhun dohiap ban pynphai ïa kitei ki kol, hynrei da ka jingtbit bad jinglah ban kyrshan ki ophisar kim shym la lah shuh ban pynphai bad pynkhih ïaka jar wat la ki don shibun ki kabu ksiar naka liang ki pastor kiba la pyrshang ban thep kol bad haduh ba kut ka kylla miet ka jingïalehkai kala kut noh da 2-0 kaba la biang pura syndon ïaka kynhun ki ophisar ban rah ïaka nam lahduh jong katei ka lympung.
Naka liang ka KJP Synod Sepngi kum ka jingsah kynmaw kala sam ruh ïa ki medal sha ki rang ïalehkai jong baroh ar kynhun kiba jop bad kiba rem.
Ki MLA ka Ri-Bhoi, ryngkat ki MDC bad ki ophisar kila noh ruh ïala u jong u synñiang sha ka KJP Synod kum ka jingdon bynta lang haka jingpynkhreh ban rakhe ïaka jingdap 100 snem jong ka Dr. H Gordon Roberts Hospital ryngkat ki paidbah kiba la noh lyngba ki Donation Box bala buh ha sawdong jong ka madan.