Shillong, Lber 30 : Ka Directorate of Revenue Intelligence (DRI) ha ka 25tarik mynta u bnai ka la ïoh ban kurup haduh 1.16 kilo ka ksiar ryngkat bad 57.70 lak tyngka ka pisa hadien ba ki la ïoh ban pynap shrip ïa ka kynhun kaba donkti ha katei ka kam khaïi beaiñ ha nongbah Guwahati.
Katkum ka kyrwoh na katei ka tnad la ong ba na ki hynriew ngut kiba donkti ha katei ka kam, saw ngut ki dei shi iing, kata kynthup ïa u kpa ba tip kyrteng kum u Biolet Dura (71snem), ka khun jong u, ka Kong Proficiency Diengdoh (32snem) kiba dei na Raimohan Lane, Wahingdoh, East Khasi Hills, nangta u khun jong u, u Adrian Diengdoh (20snem) bad ka kurim jong u, ka Saphiwanphylla Lyngdoh kiba dei na ka shnong Nongmynsong, Shillong.
La ïathuh ruh ba hadien ba ki la ïoh ïa ka jingtip kaba bniah, ka DRI Guwahati ka la buddien ïa ka ïaid ka ieng jong kitei ki shiing kiba wan na Shillong ha ka 25tarik, sawdong ki bynta jong ka Lalganesh, Guwahati, ha shwa ba kin sa leit ban pynpoi ïa katei ka ksiar sha ki nongthied kiba ap ha ka iing kaba don hajan.
Ka kyrwoh ka ong ruh ba ha ka por ba kitei ki shi-ïing ki la jan poi ha katei ka iing, ki la shah khangkdong bad la khynra ruh ïa katei ka iing ha kaba la ïoh ban kurup 57.70 lak tyngka ka pisa kaba la buh ha ka jingsop cushion da ki arngut ki nongthied ba tip kyrteng kum u Prasanjit Aditya bad u Pandu Pal Aditya kiba dei na Baksa District, Assam.
Ka kyrwoh ka ong ruh ba baroh ki don 10 tylli ki biskit ksiar ba la ïoh kurup na ka Kong Proficiency Diengdoh, Saphiwanphylla Lyngdoh bad Adrian Diengdoh, ba la song bha ha ki kynja jain ba la suh bha. La ïathuh ruh ba mardor la kem ïa kitei ki hynriew ngut bad mynta ki don ha judicial custody.
Ka kyrwoh ka ong ruh ba shi bynta na ka hynriew bynta ka ksiar kaba rung sha India kadei da ka lynti kaba beain. Shuh shuh la ong ba ka India man u snem ka shalan kumba 800 – 850 ton ka ksiar katba ka jingpyndonkam pat ka poi beit kumba 1,000 ton kaba kdew ba haduh 150 – 200 ton ka ksiar la wanrah beaiñ shapoh ka ri man la u snem.
Ka kyrwoh ka ong ruh ba ka DRI Guwahati Zonal Unit ryngkat bad ki Regional Units kiba don ha ka thain shatei lam mihngi jong ka Ri ki la ïoh ban kurup kumba 208 kilo ka ksiar kaba la shongdor kumba 102.6 klur tyngka ba la pynpoi lyngba ka khappud Indo-Myanmar bad Indo – Bangladesh.
