Wat la ym don Techinical Expert na kiba design ym don jingujor eiei, ong u Speaker

Shilong, Nailur 16: U Lamphang ka Ïing Dorbar Thaw Aiñ ka jylla u Bah Metbah Lyngdoh ha ka sngi Thohdieng u la ïathuh ba hadien ba na ka liang ka kynhun tohkit ba laitluid na bynta ban tohkit ïa ka daw ka jingkhyllem noh ka tnum pyllun(Dome) ba la thung da ka sorkar ka la ai dep aiti ïa ka kaiphod tohkit jong ka sha ka sorkar bad la lap ba ka daw hi kaba pynlong ban khyllem kane ka tnum pyllun ka dei ba kam jingbym don jingïatreilang satia hapdeng kiba design, kiba pyntrei ne contractor bad ka nongpeit pyrman ïa ka jingpyntrei kata ka PWD.
Haba kren sha ki lad pathai khubor u la ïathuh ba ha ka jingïalang ba la lum ha ka ophis ong u hapdeng ki dkhot ka High Powered Committee(HPC) bad ka sorkar ha ka kamra treikam jong u ha Rilbong ka sorkar ka la ai khubor ïa kiei ki sienjam kiba dei ban shim bad kiei ki jinglap na ka kynhun tohkit halor kane ka jingkhylem ka tnum pyllun.
U Lamphang u la ïathuh ba ka ha ka por ba pyntrei ïa kane ka building na ka liang ka kompeni ba design kim shym la buh satia ïa ki techinical expert ban peit ba ka jingtei ïa kane ka builidng bad ki la pdiang ruh ba ki ruh ki long shi bynta na ki daw ban jia kane ka jingkhyllem u tnum pyllun bad kumjuh u la ong ba na ka liang ka kompeni ba ioh ïa ka kontrak ruh ka la pdiang ba ki ruh ki dei kei ka daw ba ka jia kane ka jingjia.
U Lamphang u la ong ruh ba ka liang ka IIT Guwahati kaba la tohkit ban lap ïa ka daw ka jingkhyllem bad kumjuh ïa ka jinglong jingman jong kiwei pat ki bynta jong ka bulidng ba dang sah.
U la la ong ruh ba hadien ka jingtohkit la lap ba ki bynta ba dang sah jong kane ka building ka dang skhem bad kam don kano kano ka jingsator na ka jingkhyllem noh ka tnum pyllun jong ka assembly.
U la ïathuh ruh ba na ka liang ka sorkar hadien ba la ai jingmut na ka kynhun tohkit laitluid la rai ba ka jingtei ïa biang ïa ka tnum pyllun kan dang ïaid shakhmat hynrei kan pyndonkam noh da ki mar kiba kham sting bad ïa kane yn sa pynwandur biang da kajuh hi Design Associate kaba la pynwandur hynrei kan hap leh ïa kane khlem jingsiew.
U la ong ruh ba ïa ka jingtei biang ïa kane ka tnum pyllun ka kompeni ba pyntrei ïa kane ka UPRNN kan hap bah khlieh ïa ka bai lut bai sep ban tei bad ruh ban pynkhuid ïa ki jaboh jabaiñ kiba mih na ka jingkhyllem jong kane ka tnum pyllun.
Shuh shuh u la ong ba na ka liang kaba design ka la mynjur ba kan phah uwei u techinical expert ban peit ba ka jingtrei kan long kat kum kaba ki pynwandur bad kumjuh na ka tnad PWD ruh kan thung da ki expeert jong ka ban pynthikna ba ka jingpyntrei kan long kaba paka.
“Namar kat kum ka kyndon ka kontrak ba la soi la kdew shai ba lada ka don ka jingjia ba ka khyllem ne kano kano ka jingjia ba julor ka bynta kane ka building ha ka por ba dang trei ïa kane ka building na ka liang kita kiba long ka daw ka jingkhyllem kin hap ban buria ban tei ïa kane ka building” ong u Lamphang.
Haba ïadei ba ka jingpynshitom ïa ki nongtrei ka PWD kiba peit pyrman ïa kane na ka liang ka sorkar kan sa shim da ka sienjam jong ka.
Haba jubab halor ka jingsdang biang ban trei na bynta kane u bah Metbah u la ong ba ïa kane ka kam yn sa sdang noh shen.