Shillong, Nailur 16: Ka UDP Pynursla Circle ka la pynpaw ïa ka jingsngew khia ha kaba ïadei bad ka jingthmu ka sorkar ban aiti ïa ka MeECL jong ka Pynursla Sub Division sha ka kompeni (Franchisee) namar ba kane kan ktah ia ki longïing kiba pyndonkam bor ding.
Ha ka jingïalang ka UDP kaba long mynta ha ka sngi Thohdieng ha Pynursla, hadien ba la ïathir ka la rai ban pyrshah ia kane ka jingthmu ka sorkar ban aiti sha ki riew shimet bad ha kajuh ka por, kan leit kynduh ia u SDO ka MeECL ha Pynursla ban pan jingshai halor kane ka jingthmu, kaba la pynsah umdum ia ki paidbah baroh.
Ka party ka la ong ba kane ka jingthmu ka sorkar kan buh jingeh ia ki paidbah namar ba mynshwa ruh ha ka por ba ka sorkar ka ai ha ki riew shimet ban lum ia ka bai thang ding, ka la wanrah shibun ka kynrum kynram ia ki paidbah. Ka UDP ka la ong ba ka sorkar ka dei ban leh kumba ju mynta khlem da donkam ban wanrah ne aiwai pynban sha kiwei ki kompeni.
