Shillong, Nailur 16: Ka thma ktien hapdeng u Myntri Rangbah, u Conrad Sangma bad u MLA ka Umroi ka la mih biang mynta ka sngi ha Ïingdorbar Thawaiñ bad mynta ka sngi pat kadei halor ka jingkylli ïa ki kam ne ki post kiba lait na ka jylla.
U MLA ka Umroi, u la buh ka jingkylli katno tylli ki kam kiba lait bad kiba la mang pisa ha ka jylla naduh ka snem 2018 haduh 2022. Na ka liang u Myntri Rangbah ha kaba nyngkong u la jubab ba ka sorkar ka dang wad jingtip ne lum jingtip halor kane. Halor kane ka jingjubab u Myntri Rangbah, u Bah George u la pynpaw ka jingbym hun bad kyntu ba u Myntri Rangbah la kumno kumno udei ban ai bad dei ban tip lehse tang ha ka shi snem ne arsnem. U Conrad u la ïeng ban jubab biang ba kam dei kaba suk ïa ka sorkar kan ai ïa kine ki jingtip namar ba ki don bun tylli ki tnad treikam, ha kaba ki don haduh 63 tylli ki Directorate, 60 tylli ki Department, 12 tylli ki ophis DC, 6 tylli ki ophis SDO Civil, 46 tylli ki C&RD Block nangta sa ki Meghalaya House ha Kolkata, Delhi, Mumbai bad Vellore. “Ngam kwah ban ai ka jingkheiñ ka bym thikna, namar ngan sa shah kynnoh ba nga ïalam bakla ïa ka ïingdorbar”, la ong u Conrad.
Halor kane ka jubab, la ïeng sa u MLA ka Rangsakhona, u Zenith Sangma, uba la ong ba ka sorkar ka kwah ban pynkyllaiñ ïa kane ka kam kaba suk ban jubab, namar ka kwah ban buhrieh bad kam kwah ba ki samla kin suk ha ka jingwad kam wad jam. U Conrad u la ïai ban ba um kwah ban jubab da ki jingkheiñ ki bym biang.
U Bah George u la ïeng biang ba lada u Myntri Rangbah um lah ban ban ai baroh ki snem udei ban ai noh tang jong u snem 2021-’22 ruh. Hangne ruh u Conrad u la ong ba lada u ai ruh ki dkhot kin nym hun bad kin kynnoh ia u laiphew jait. U Bah George u la ong ba u Myntri Rangbah um dei ban jubab da kaba shu tharai ba ki dkhot kin nym hun ne kynnoh ïa u, namar kim dei shuh ki khunlung. Hangne ka la mih ka jingïania haba u Conrad u la pynkynaw ïa ka jingkylli kaba u MLA Umroi u la kylli halor ka jingkieng ha Umiam. Katba dang kren u Conrad, u Bah George u la ïeng ban knieh ktien da kaba ong ba u nongïalam jong ka ïingdorbar u shu kdat kai ïa ka kam kabym ïadei satia bad ka jingkylli bad u shu kwah ban pynlut kai ïa ka por sha kiwei pat ki bynta. Hangne la mih biang ka jingïainia tad haduh ba u Shnongknor ka ïingdorbar, u Bah Metbah Lyngdoh, u la pynkut noh ïa ka jingbuh jingkylli halor kane ka mat.
