Takraiñ ka VPP ba shah kyntait ka Bill u Bah Adelbert halor ka Casino

Shillong, Nailur, 16: Ka Voice of the People Party (VPP) ka la pynrem jur ïa ka Sorkar da kaba ong ba ka dei ka bym don jingsngew bad ka jingleh hangamei khamtam eh ïa ka jingbym sngap shuh ïa ka jingsngew ki paidbah babun balang ha ki mat kiba ktah ïa ka rukom im bad jinglong ba tynrai jong ki trai muluk ki trai jaka.
“Ngi sakhi ba kane ka Sorkar ka mut ban ïaid beit shakhmat ban pynlong ïa ka jylla Meghalaya kaba paw ha ki kam khalai Casino kaba long pyrshah ïa ka mon bad ka jingkwah u paidbah. Kane ka paw shynna da ka jingkyntait jong ka ban pdiang ïa ka aiñ rew (private member bill) ban pyndam noh ïa ka aiñ khalai jong ka Sorkar kaba la wanrah da u MLA jong ka North Shillong Constituency u Bah Adelbert Nongrum ha kane ka sien shong Dorbar ba dang shu kut,” ong u President ka VPP u Bah Ardent M. Basaïawmoit.
“Ka jingkren jong u Myntri Rangbah ka Jylla ba hana la pyndam noh ïa kane ka jingthmu wanrah ïa ka Casino kam dei kaei kaei kaba lah ban ngeit hynrei ka dei tang ka jingpyrshang ban pynthame ïa u paidbah bad khamtam ïa ki nongïalam Balang hapoh ka shatri ka KJCLF kaba la pynpaw shai ïa ka jingpyrshah kaba jur ïa kane ka jingleh ka Sorkar,” u la ong.
‘Ka jingkren jong u Myntri Rangbah kam shai satia ruh ba ka Sorkar kan pyndam noh ïa kane ka aiñ khalai kaba ka la wanrah, hynrei u shu kdew ba ka Sorkar kan ym ïaid sha khmat ïa ka jingthmu. Shuh shuh u Myntri Rangbah u la kren shai ba ka Sorkar kan ym pyndam noh ïa kaei kaei kaba ka la leh na bynta kane ka kam. Kaei kaba thikna hangne ka long ba baroh ki rai kiba la shim kham ha shwa kin neh kumba ki long. Kumjuh ruh lah ban sngewthuh ba Ïa ki licence kiba la ai ruh kan treikam beit katkum ba la batai da u Myntri ka Taxation u James Sangma hapoh ka Ïing Dorbar,” la ong shuh shuh u Bah Ardent.
“Sa kawei pat ka mat kaba kaba ktah ïa ka jylla ka dei ka rai ka sorkar ban pynlong ïa kata ka Cherry Blossom Festival bad kane ka rai ka Sorkar ka la wanrah shibun ki jingkynthoh na kiba bun ki liang. Kane ka tamasa jong ka Sorkar kam don eiei ka ban pyni ne pynphalang ïa ka riti bad ka ka jinglong kyrpang ka rukom im jong ki nongshong shnong ka jylla hynrei kan wanrah pynban ïa ka ki jingjia kiba isaitmet kiba lah ban pynhiar dor bad pynjahburom ïa ki nongshong shnong bad ïa ka jylla hi baroh kawei,” la kynthoh ka VPP.
“Shuh shuh lada kaei kaba la mih ha ki lad pathai khubor ka long kaba shisha ba ka Sorkar ka shim da ka ram na bynta ban pynlong ïa kane ka tamasa, ki paidbah ka jylla ki don ka hok ban pyrshah ïa kane bad ruh ban buh jingkylli ïa ka Sorkar halor ka rai ban pynlong ïa kum kane ka tamasa. Ngi la dei lypa ka jylla kaba la kit ka ram shi rynjaiñ bad kane ka jingbteng ban shim ram kan nang pynsniew shuh shuh ïa ka pla tyngka jong ka jylla,” u la ong.’
“Namarkata ngi kwah ban kyntu ïa kiba don ha ka bor bad kiba bat ïa u lakam synshar ba kin sangeh shisyndon ka jingpynsyrwa kai ïa ka pisa u paidbah ha ki kam kiba ym wanrah jingmih eiei na ka bynta ka bit ka biang jong ki paidbah ka jylla,” la kyntu u Bah Ardent.