Shillong, Nailur, 16: Ka jingïakhun ïa ka khlam Covid-19 ha Jylla Meghalaya ka la pynsuba mynta ba ka don ka jyrsieh kaba jur hadien ka jingmih ka jingkylli ïa ka rukom pynlut jong ka National Health Mission (NHM) ïa palat T. 567 klur ha kine ki lai snem ba wan lynshop kane ka jingpang.
Kat kum ka jingkheiñ bala ïoh na ka Tnad ka Koit ka Khiah, ka Jylla Meghalaya kala pynlut haduh T. 8,16, 22,52,312 klur ban ïakhun ïa kane ka khlam kaba la wan lynshop ha Jylla naduh u Lber 2019 kat haduh mynta mynne.
Ki Heh Ophisar ka Tnad ka Koit ka Khiah (ki bym kwah pynpaw kyrteng) ki pyntip ba na kane ka song pisa ba T. 816 klur tam, ka National Health Mission (NHM) ka dei kaba pynlut bun eh kaba kot haduh T.567,29,72,968 watla ka dei tang ka Agency kaba dei pyntreikam ïa ki prokram jong ka Sorkar Pdeng.
Kine ki Heh Ophisar ki pyntip ba ka Tnad ka Koit ka Khiah lyngba ka Directorate of Health Services (MI) ka la pynlut tang T.2,48,92,79,344 klur bad kane ka pisa ka kynthup ïa ka song pisa ba ai da ka Sorkar Pdeng kaba long T. 8,00,98,000 bad kaba ai da ka Sorkar Jylla ka long T. 2,40,91,81,344.
Haba ai jingkheiñ ïa ka jingpynlut ka Tnad DHS(MI), kila ong ba kane ka Tnad tang haba siew ïa ka bainong jong ki Nongtrei Contract kiba ïarap ïa ka Jylla ban ïakhun ïa ka khlam ha kine ki lai snem, kala kot ïa ka T.62,73,85,817 (62 klur tam) bad kaba bun eh ka dei ka jingthied ïa ki dawai, ki tiar sumar naduh ki Oxygen, Ventilator, Generator, ECG Machines, X-Ray System bad kiwei kiwei kaba kot T. 1,77,27,46,039.
Kiwei pat ki jingpynlut ka dei ka jingthied ïa ki kali na ka bynta ka Carona Care Centre ha Umsawli, ka jingshimwai ïa ki kali ban kit ïa ki Oxygen Cylinder bad kiwei kiwei kaba kot T. 1,01,81,388, ka jingthied ïa 10 tylli ki Ambulance bala bei tyngka da ka NESID T.1,59,98,650, ka jingpynlut ban tei ïa ka hospital pre fab ha Tura T. 2,58,84,000, ka jingpynlut ban tei ïa ka hospital pre fab ha Shillong ba kot T. 2,58,84,000 bad ki jingtei ïa ki jaka buh Oxygen ha Jengjal, West Garo Hills ba kot T. 80,13,250 bad ha Carona Care Centre, Umsawli ba kot T. 1,11,99,450.
Kine ki Heh Sorkar ki ïathuh ba tang ka jingpynlut jong ka NHM kaba dei ka Agency ba pyntreikam ïa ka prokram jong ka Sorkar Pdeng kaba kot haduh T. 567,29,72,968, (T. 567 klur tam) ym shym la ïoh jingkheiñ satia khamtam haba bun ki tiar sumar bad ki jingtei ki dei kiba la pynlut da ka Ophis u DHS(MI).
Haba pyntip ba ka Sorkar Jylla kala ïoh jingïarap haduh T. 76,56,18,000 (T.76 klur tam) na ka Sorkar Pdeng, kine ki Heh Ophisar ki ong ba na kane ka pisa, tang T. 8,00,98,000( T. 8 klur) la pynlut da ka Ophis u DHS(MI) katba T. 7,57,608,200 ( T.7.58 klur) lah pynlut da ka NHM ïa kaba ym lah ban tip kumno ka pynlut bad shaei ka pynlut.
Kine ki Heh Ophisar ki ong ba kat kum ka rukom treikam, ka song pisa ba dei ban leit sha ka NHM ka dei ban wan haduh 90% na ka Sorkar Pdeng bad 10% na ka Sorkar Jylla.
“Hynrei kumno ka NHM ka lah ban ïoh pynlut haduh T.567 klur tam ka pisa haba ka sorkar Pdeng ka dang ai tang T.7.58 klur ka bym pat kot wat shi percent ka bhah na ka Jylla” kila buh jingkylli.
Kine ki Heh Ophisar kila ong ba kane ka kam ka dei ïa kaba hap ban pynlong ïa ka jingtohkit bad kaba dawa ruh ïa ka jing tohkit khnang ba kan shai ha ka rukom pyndonkam ka NHM ïa kat kane ka song pisa bala pynlut da ka Jylla ban ïakhun ïa kane ka khlam.
