Jowai, Nailur 16: Hynñiewtrep Integrated Territorial Organization (HITO) Saphai Area mynta ka sngi ha ka jingïalam u President samla Pynhun Shulet ha ryngkat ka jingïadon lang u General Secretary samla Melki Dhar bad u Public Secretary samla Jemi Phadong kila leit ban jurip ïa ka skul Saphai Pohrtiang Government Lower Primary School.
Ha kane ka jingleit peit ka seng ka la lap shibun ki jingduna, ka ïing skul ruh ka la orpait, ki tin kiba la pei thliew, ki ben ruh dang duna, kaba pynlyngngoh shuh shuh ïa ka seng ka long namar naduh ba sdang ïa katei ka skul ha u snem 1978 wat tang ka kamra ne ka ophis na bynta ki nonghikai ruh kam don ha katei ka skul.
Ka seng ka la ïoh ruh ban ïakren bad ka Head Teachers jong katei ka skul na ka liang jong ka ruh ka la ong ba ki la dep ban phah shithi sha ka sorkar bad kila don ruh ha ka list ban maramot ne repair ïa katei ka skul hynrei haduh mynta ym pat sdang ban repair ne maramot ïa katei ka skul, ki ong ruh ba ki don tang saw ngut ki nonghikai namar ba naduh ba ïoh shongthait ne pension jong kiwei ki nonghikai ym don pat ba mih da i wei i nonghikai ha ka post ba thylli.
Ka seng ka dawa na ka sorkar ba kan pynkiew kyrdan noh ïa kane ka skul sha ka Upper Primary School bad ka dawa ruh na ka sorkar ba kan peit lem ïa ki skul sha ki thaiñ nongkyndong khnang ban ïoh jingmyntoi ki paidbah bad ban kiew kyrdan ha ka jingpule jong ki khynnah ka jylla baroh kawei.
