Nongpoh, Nailur 16: Sa tang da ki bnai ban poi noh sha ka samoi ban pynthymmai biang ïa ki nongmihkhmat na ki Constituency bapher bapher hapoh ka jylla sha ka ïing Dorbar thaw aiñ ka jylla, ka lyer jong ka election ha Ri Bhoi District ka la dang suhthied ha baroh ki Constituency ha Ri Bhoi ha kaba kito ki kyrtong kiba thmu ban ïa aireng ki la ïaid shaphrang ban leit pan ka jingkyrshan na ki paidbah na ka bynta ban pynjop ïa ki ha kane ka election.
Kumba paw ha Ri Bhoi District haduh kine ki sngi dang bun ki party kiba ym pat lah ban pynbna paidbah lut ïa ki kyrtong ba ki thmu ban pynieng ha kane ka election na ki san tylli ki constituency, hynrei ka sur na ki paidbah ka la dang sawa bad bun ki kyrtong ki la sdang ban ïaid sha ki paidbah ban pan ka jingkyrshan na ka bynta ka election 2023 hapoh ka jylla.
Kawei na ka kyrteng ba la sdang ban sawa ha Ri Bhoi District, ka dei ka kyrteng jong u Bah S.W Rymbai, uba dei u MLA barim ka Umroi Constituency bad ha kane ka kynti une u rangbah u lah ban ïa aireng biang ha kane ka election bad kumba la sawa ka sur na ki paidbah une u rangbah un lah ban ïa khun biang na ka party Congress kaba u la jop teng kum u MLA ka Umroi ha u snem 2013.
Haba kren halor une u rangbah, kumba paw shabar haduh mynta um pat pynpaw pyrthei ba un ïa khun na ka party Congress, hynrei ka sur kaba mih na ki paidbah ka long ba une u rangbah ha kane ka kynti u lah ban ïakhun biang na ka party Congress ha kaba la don ka jingtyrwa na ka party Congress ba ki thmu ban ai ïa ka ticket bad ka rai kaba khatduh ka long ha une u rangbah ha kaba haduh mynta la un ïa khun ne um ïa khun um pat pynpaw pyrthei ha ka sur kaba mih na ki paidbah ka party congress ka la ibit ïa u ba un shimti biang kum u kyrtong ban aireng ha kane ka election 2023 na Umroi Constituency na ka party Congress.
Wat la ha kiwei kiwei ki Constituency ha Ri Bhoi, la bun ki kyrtong kiba la pynpaw pyrthei ba kin ïa aireng ha kane ka election 2023 bad haba kren tang ïa ka umroi Constituency haduh kine ki sngi dang mih tang 3 tylli ki kyrteng jong ki kyrtong ba kynthup ïa u Bah George B. Lyngdoh kum u MLA (Seating MLA), u Damanbait Lamre, uba dei u khun MLA barim ka Umroi, u Ma Ngaitlang Dhar bad kynthup ïa u Bah S.W Rymbai, uba dei hi u MLA baraim ka Umroi.
