Jowai, Nailur 16: Ka Jaiñtia Students Union (JSU) kala ai ka jingkyrshan ba pura ïa ka jingdawa ka Society for Study of Law, Jaiñtia Hills ban buh ïa ka National Law University kaba dei kawei na ki jaka pule ba ai jinghikai ïa ka jingpule aiñ ba kham long paka kaba ïaryngkat ruh kum kiwei pat ki National Law University ba don ha kiwei pat ki jaka ka Ri India. ïa ka National Law University Ordinance 2022 la ai jingmynjur da ka cabinet ka Meghalaya Democratic Alliance ha ka 4 tarik July 2022.
Ka seng ka ong ba ka Jaiñtia Hills ka dei ka thaiñ kaba haduh mynta um don ïa kino kino ki jaka pule ba kongsan (premier institute) watla mynta la don 50 snem ka jingïoh ïa ka jylla. Ka Jaiñtia Hills kam don kino kino ki jaka pule ha ki Graduate Professional Course bad watla kiwei pat ki District ka la don ki jaka pule kum ka NEHU Shillong bad Tura Campus, NIT, NEIGRIHMS, IIM Shillong bad kiwei kiwei bad kumjuh ruh kiba dang propose kum ka Shillong Medical College, Shillong Engineering College, Tura Medical College, Diary & Veterinary College Ribhoi, Fishery College Garo Hills hynrei um don jingphai khmat pat sha ka Ri lum Jaiñtia.
Halor kane ka JSU ka la phah shithi sha u Mintri ba dei peit ïa ka Law u James Samgma, u Education Minister u Lahkmen Rymbui, u Chief Minister u Conrad sangma bad ïa baroh ki MLA KA Jaiñtia Hills bad ruh u MP ka Lok Sabha u Vincent Pala bad u MP ka Rajya Sabha u W.R Kharlukhi mynta ka sngi 16/9/2022.
