Shillong: Ïa ka prokram ban sam syrnot ïa ka kynhun kaba 96 kiba la pass ïa ka jingai jinghikai computer bad ka kynhun kaba 36 jong ka jingai jinghikai language ha Ramakrishna Mission Vivekananda Cultural Centre ka la long mynta ka sngi, ka 14 tarik u Nailur 2022 ha Shillong.
Ha kane ka prokram, kane ka jaka ai jinghikai ka la sam palat 1300 tylli ki certificate sha ki shahhikai kiba la pass ha ka Computer bad Language. Ka Ramakrishna Mission, Shillong ka ai jinghikai computer ïa kumba 6000 ngut ki samla ha ki san tylli ki bynta ha ka shi snem.
Kane ka jingsam certificate ka dei na ka bynta ki shahhikai ha ka bynta kaba long naduh u bnai Naitung haduh Nailur 2022 kaba long ka kynhun kaba 96 jong ki shahhikai kiba don kumba 1700 ngut ki samla na kylleng ka thain shateilammihngi.
Ki shahhikai kiba leh kham bha ki long, Beginner – Ka MerihunLyngdoh (English), Ka Teisukbiang Khongwar; Intermediate – U Glantis Roy Suting; Tally -I – Ka Meba Ai Shisha Syiem; Tally-II Ka MerihunLyngdoh; DTP- U Pynsanbhor Jana; Professional – Ka BanishaKharbi; Database & Python- Ka Sophia Katrai;
Ha kane ka sngi la pyllait paidbah ruh ïa ka bynta kaba 6 jong ka ezine ha ki lai tylli ki ktien kiba long – ‘Kajingshai’, ‘The Light’ bad ‘Jyoti’ (Vol 3 Issue 2) ha ka jingïadon long ki nongthoh kiba tbit bad ki heh ki hain. Ka Kong SilbiPassah , Prof Streamlet Dkhar, Dr. Bakhiamon Rynjah, Dr. MoushumiDey, Dr. OmarlinKyndiah, Babu P S Lyngdoh, Banlam K Lyngdoh, EhsingKhiewtam ki dei ki nongthoh kiba la ïadon lang ha kane ka sngi.
Ka kongsan ha kane ka prokram, ka Kong Anita Kharpor, Director ka tnat Employment and Craftsmen Training jong ka Sorkar Meghalaya ka la ai jingïaroh ïa ki kam jong ka Ramakrishna Mission bad ka la kyntu ïa ki samla pule ba kin pynrung kyrteng ïalade ha ka rynsan online jong ka tnat Employment and Craftsmen Training (https://dectmeg.nic.in/) haba ki la pyndep ïa ka jingpule namar kane ka rynsan ka pynïasoh ïa ki bad ki nongai kam ha kylleng ka jylla bad ka ri.
Ka la ai mynsiem ïa ki samla da kaba kdew sha ki kyntien u Swami Vivekananda “Ka jingshaniah jong nga ka dei ha ki samla, ki samla jong ka juk mynta, na ki kin mih ki nongtrei jong nga. Kin pynbeitlut ïa ki jingeh, kum ki sing.”
Ha ka jingkren ïa ki samla pule, u Swami Divyaswarupananda Maharaj, In-charge, Ramakrishna Mission, Shillong, u la batai shaphang ka jingai jinghikai ïa ki briew kumba la thmu u Swami Vivekananda. Ka roi ka par ha ka ri kan wan tang lyngba ka jingai bad ka jingpdiang ïa ka jingnang jingstad.
