13 tylli ki takma khur ki nongïakura ka jylla na ka 3rd East Zone Men & Women Boxing Championship

Shillong, Nailur 16 : Ki rang bad thei ïalehkai ïakura boxing ki la wanrah nam bad burom ïa ka jylla da kaba khur 13 tylli ki takma na ka lympung ïakura 3rd East Zone Men & Women Boxing Championship kaba la long ha Namchi, Sikkim naduh ka 11 tarik bad kaba la kut noh ha ka 13 tarik Nailur 2022.
Ki takma ba ki nongïakura ka jylla ki la khur na katei ka championship ki kynthup ïa lai tylli ki takma rupa bad 10 tylli ki takma rnong. Kiba la khur ïa ka takma rupa ki kynthup ïa u Sanjeev Maskut uba la ïoh ha ka jingïakop ba 48kg, Gimichel Sumer (67kg) bad ka samla Mellina Basaiawmoit (52kg).
Katba kiba khur ïa ka takma rnong ki kynthup ïa u Prashant Dorjee (51kg), Batsilbirth T Sangma (54kg), Sunil Limbu (57kg), u Rishanlang Lyngdoh (60kg), Wandonbok Nongkhlaw (63.5kg), u Balnas Sangma (71kg). Katba ha ka liang ki kynthei kiba la jop takma rnong ki kynthup ïa ka samla Gracynylla Marbaniang (48kg), Shreena Thapa (50kg), ka samla Trdicia Lamare (54kg) bad ka Riteeka Sarki (57kg).
Na ka liang ka Meghalaya Boxing Association (MBA) ka pynpaw ka jingsngewkmen bad ai khublei ïa kitei ki samla kiba la khur ïa ki takma bad wanrah nam bad burom ïa ka association bad ïa ka jylla hi baroh kawei.