Da 5-2 kol pynliem ka Langsning FC ïa ka Ryntih SC ha ka SPL 2021-22

Shillong, Nailur 16 : Ka Langsning FC ka la khur jingjop ha ka lympung ïalehkai OC Blue Shillong Premier League (SPL) 2021-22 da kaba pynliem da 5-2 kol pyrshah ïa ka Ryntih FC ha ka jingïalehkai ha ka sngi Thohdieng ha madan MFA Third Ground, Polo, Shillong.
Ha katei ka jingïalehkai u Kitboklang Pale u la khyrwit hat-trick.
Haba wan ban mih madan ha katei ka sngi, ka Langsning ka kamai 22 poiñ katba ka Ryntih ka kamai 17 poiñ. Ha ka kylla kaba nyngkong (first leg) kitei ki ar tylli ki team ki la ïasam mar shi poiñ hadien ba ki la ïakhaid da 1-1 kol.
Haba phai pat sha ka jingïalehkai ha ka sngi Thohdieng, ka jingïalehkai ka long kaba mar ïakhaid mar ïasdang ka jingïalehkai hynrei dei ka Langsning FC kaba la plie pyrda nyngkong ha ka minit ba 5 ba la thep da u Kitboklang Pale.
Ka Langsning ka la nang ïakhun tyngeh shuh shuh bad ñion sha ka kut jong ka Ryntih bad ha ka minit ba 22 jong ka jingïalehkai, u Kitboklang Pale u la thep sa ïa ka kol kaba ar ha kaba ka kynhun ka la nang ïoh mynsiem.
Watla ka Ryntih FC ha kane ka jingïalehkai ka don tang 12 ngut bad ka la hap ban ïalehkai pura tang ki 11 ngut khlem da pynmih bujli. Hapdeng ka jingïalehkai kaba kham noh shilliang, pynban ka Ryntih ka la ïoh ban pynphai shi kol ha ka minit ba 34 ba la thep da u Mebankhraw Wahlang.
Da ka jingpynphai kol ka Ryntih ka jingïalehkai ka la nang ïathnem bha ha kaba baroh arliang ki la ïakhun tyngeh ban ïoh pynphai kol. Bad hashwa ban kut ka kylla step, u Kevinson Rymbai u la thep ïa ka kol kaba lai na bynta ka Langsning ha kaba ka la lamkhmat lypa da 3-1 kol.
Ka jingïalehkai ha ka kylla step ka la nang itynnad bad ïakhaid bha la ka long ha ka liang ka jingpashat bad pyrshang thep kol.
Ka Ryntih ka la ïoh ka kabu ban pynphai kol ha ka minit ba 70 hadien ba ka la ïoh ïa ka penalty. Bad u Mebankhraw Wahlang uba la shim ïa ka jingkitkhlieh ïa katei ka penalty khlem da pynlehnoh ei u la pynrung beit jlang ïa ka bol shapoh ka jar bad ka jingïalehkai ka la long da 3-2 kol.
Phewse kane kam shym la pynurlong ïa ka Ryntih hadien katto katne minit ba la ïaid biang ka jingïalehkai kata ha ka minit ba 85 u Kitboklang Pale u la ïa ka kol hat-trick kaba la nang pynskhem ïa ka kynhun ban khur pura ïa ki lai poiñ.
Watla ka la ïoh ban thep saw kol pynban ka Langsning ka khlem pat hun bad nang pynthikna shuh shuh ïa ka nam jop, u Roikhihbha Nongtdu (90’+2) u la thep ïa ka kol kaba san ha kaba ka Langsning ka la pynliem syndon da 5-2 kol.
Ka jingïalehkai mynta ka sngi kan long hapdeng ka Rangdajied pyrshah ïa ka Mawlai SC. Ha ka jingïalehkai kaba la dep, ka Mawlai SC ka la pynliem da 1-0 kol ïa ka Rangdajied United FC.