Toiñ hap pyndem ka Sorkar ha ka sur kiba bun balang halor ka Casino

Shillong, Nailur 15: Ka sorkar jylla lyngba u Myntri Rangbah ka jylla mynta ka sngi u la ïathuh ba na ka liang ka sorkar ka la rai ban sahngeh noh ban plie ïa ki ktem khalai (Casino) ha ka jylla hadien ba ki mih ki jingpyrshah na kiba bun ki liang ïa kane ka rai ka sorkar ba kyntup naduh ki nongïalam niam, ki seng bhalangh, ki khlieh nongsynshar, ka KHADC bad ki riew paidbah.
U Myntri Rangbah ka jylla u Conrad Sangma u la ong ba kane ka jingrai ka sorkar ban sahngeh noh ïa kane ka jingthmu jong ka namar ka jingpyrshah kaba mih na kiba bun ki liang bad namar ka NPP hi kum ka seng kam ju ïaid lait na ka jingsngew u paidbah u la ïathuh ha ka jingïalang jong ka NPP ha ka ophis jong ka ha Shillong.
Haba ïadei bad ki license kiba ka sorkar ka la ai u Myntri Rangbah u la ong ba kine ki license kiba la ai ki dei tang ki license ba shipor ne provisional license kiba ka rta jong ki ka kut tang 6 bnai.
“Hadien ba ki mih ki jingpyrshah na ki paidbah bad ki nongïalam niam ngi la rai ban sahngeh noh ïa kane ka kam bad ki license kiba la ai ruh kin kut noh shen bad ngin ym pynjlan namar ka sorkar kam kwah ban ïaid sha khmat” u la ïathuh.
U la ong ruh ba ha ka jingshisha ka jylla kan ïoh ka khajna kaba ym duna ïa ka 500 klur ha ka shisnem hynrei wat la katta ka sorkar kan ym ïaid shuh shakhmat ïa kane ka kam ban burom ïa ka jingsngew kiba bun balang.
“Lada ngi ïoh ban plie ïa kane ka kam khalai kiba bun ki jaka sumar sorkar, ki skul bad ban siew tulop ngin jin da la ïoh ban pyndonkam da kane ka pisa ba ngin ïoh lum” u la bynrap.
U la ïathuh ruh ba kitto ki lai tylli ki license kiba la ai ki dei kiba ka sorkar ka la ai la kham slem kata naduh ki por shuwa ban mih ka jingpyrshah na ki paidbah ka jylla.
Haba ïadei bad ka Gaming Act u Myntri Rangbah u la ong ba ka jingwanrah ka sorkar ïa kane ka aiñ ka long ban teh lakam ïa ki jingdon ki jaka khalai ne ki Gaming parlour kiba la don da ki phew phew snem kiba la leit. U la ong ruh ba da kane ka aiñ ka sorkar kan pynthikna ruh ban ïoh khajna khnang ban pynmyntoi ïa ki paidbah ka jylla.
Kumban shu pynkynmaw hangne ba na ka liang kiba bun ki kynhun seng bahlang, ki nongsynshar shnong na Them Ribhoi bad kum ruh ki nongïalam niam ki la pynpaw ïa ka jingpyrshah ïa kane ka jingthmu ka sorkar naduh ba marsien sdang paw pyrthei kane ka kam.
Dang ha ka sngi Balang ka kynhun ki nongïalam ki balang Khristan ki la leit ban kynduh ïa u Lamphang ka Ïing Dorbar Thaw Aiñ ka jylla ban pynpaw ïa ka jingpyrshah halor ka jingai license bad ka sorkar na bynta ki lai tylli ki jaka khalai ban plie ha Ribhoi.
Yn ïaid beit ka Rally ka HITO:
Ka Hynniewtrep Integrated Territorial Organization kala rai ban ïaid beit shakhmat ïaka rally pyrshah Casino wat hadein bala pynbna u Myntri Rangbah ka jylla ban kynran dien ïaka jingpynïaid ïaka khalai casino ha them Ribhoi,
Katkum ka Kyrwoh ba la phah da u President, u Bah Donbok Dkhar, la ong ba naka liang ka Seng kala ong ba kam shaniah shuh ïa u Conrad Sangma namar ka la sakhi ba ula thok ïaka jaitbynriew bad ka jylla hi baroh kawei.
Halor ka jingong jongu ban pynsangeh ïa ka Casino, ka HITO ka ong ba khlem kano kano ka jingthoh ne ka notification kaba shai kan nym lah ban pdiang ïa ka tang haka jingkren.
Shuh shuh ka Seng ka ong ba kum ban shu pynkynmaw halor ka CAB /CAA u Conrad u ong ba ka jylla Meghalaya kan lait nakata ka aiñ CAA hynrei dei ka para jong u hi ka Agatha Sangma kaba kyrshan ïaka CAA hapoh Parliament. Naka liang ka Seng ka kwah ban ïoh jingshai naka sorkar hato ka rai ban pynsangeh noh ïaka casino ka dei hashwa ne hadien ka jingujor naka seng, dang namar shen ka Seng ka la ïoh i haki lad pathai khubor ba u Symbud Myntri u la pynbna paidbah lyngba ki lad pathai khubor ba la rai ban pynsangeh noh iaka casino hynrei katba paw pat hapoh Assembly la paw ba la ai Licence ïa lai tylli casino hapoh Ribhoi District bad dei halor kane ka nongrim ba kum ka Seng kam pdiang ïaka jing ong jong u Conrad Sangma tang ha rmiang shyntur khlem ka jingthoh kaba biang.