Ka sorkar kan khang beit ïa ka jingtih bad khaïi dewiong beaiñ ha ka jylla :CM

By Mawphor Editor On Sep 16, 2022

FILE PHOTO: Labourers work at a coal stockyard in East Jaintia Hills in Meghalaya, India, September 16, 2015. . REUTERS/Krishna N. Das

Shillong, Nailur 15 : U Myntri Rangbah ka jylla u Conrad K Sangma u la ong ba ka sorkar kan ym shong kli kti hynrei kan ïakhun ban khang beit ïa ka jingtih bad khaïi dewiong beaiñ ha ka jylla.
Nalor ki jingkem bad pynngat kyndon, ki bor synshar district ki pyrkhing ruh ïa ka jingpeitngor ban ym don ba ïoh lad ban tih bad khaïi dewiong beaiñ bad haba ïoh bat ne ïoh kem ïano ïano ïa kiba pynkheiñ aiñ la pynngat ha ki kyndon aiñ ba khlaiñ bor kum ha ka IPC bad MMDR Act 1957, ong u Myntri Rangbah haba jubab ha ka Call Attention Motion ba la wanrah da u MLA ka Mawlai u bah P.T Sawkmie halor ka jingjia khyllem ka krem dewiong ba dangs hen ha West Khasi Hills ha kaba uwei u nongtih dewiong beaiñ ula khlad bad uwei pat u mynsaw jur.
U Myntri Rangbah ula ong shuh shuh ba ki bor synshar district ki la pynkhlaiñ bha ïa ka jingïaid pahara ban khang lad ïa kane ka jingtih bad khaïi dewiong beaiñ da kaba ki pulit ki la pyndonkam ruh da ki drone.
U Conrad u la ïathuh ba ka tnad Mining bad Geology ka la ai jingïarap ruh san lak tyngka sha ka long ïing jong u Lopendro Sangma uba la khlad ha katei ka jingtwa ka krem bad 50 hajar tyngka sha ka ïing u Hendid Momin uba la mynsaw jur,kiba na ka shnong Ugur , North Garo Hills.
U DC u la thung ruh ïa u bah H.K Thabah ADC bad L.Kharbamon EAC ba dei peit ïaka Mawshynrut Civil Sub Division ban tohkit halor ka jingjia.
Ka jingtohkit ka la pyntip ba kane ka jingtwa jongkane ka krem kala jia ha ka 19 tarik Nailar 2022 bad u trai jong kane ka krem u dei u Hubert R Sangma bad dei ruh ma u uba phah tih ïa une u dewiong.
Ha ka 23 tarik Nailar 2022 u Director Mineral Resources, Mining Engineer, Mining Officer jongkat nad Mining and Geology ryngkat bad u Police Inspector bah D Mawlein ki la hiar sha katei ka jaka ban tohkit halor ka jingjia. Kane ka jaka ba la jia ka don shapoh lawbah bad ka hap hapoh u pud ka West Khasi Hills. Ban poi sha katei ka jaka ba kyrteng ka Urak hap ïaid na Riangdim da ki kali fourwheel. Ka shimpor ar kynta duna na Shallang shas Riangdim bad na Riangdim sha Urak hap ïaid da ka kjat sa kumba shikynta shiteng ei ei. La ujor FIR ïa u Hubert R Sangma uba dei u trai ka par dewiong bad ki pulit ki la kem ïa u bad ka jingtohkit ka dang iaid shakhmat.