Paw ki dak ba la thikna ka tiket BJP na North Shillong kan leit sha u Bah MH Kharkrang

Shillong, Nailur 15: Katba ka ilekshon sha ka Ïing Dorbar Thawaiñ ka jylla ka la nangjan bad ka jingïaknieh tiket ka la nangkhluit ha ki katto katne ki constituency bad ki party, mynta ka sngi ka Bharatiya Janata Yuva Morch(BJYM) North Shillong Mandal ka la pynlong ïa ka jingïalang pynkup burom ïa u heh pulit ba la shong thait u Bah Mariahom Kharkrang ha ka jingdon lang ki heh BJP naduh u President u Bah Earnest Mawrie, u National Executive Member ka BJP u Bah AL Hek bad kiwei kiwei ki heh nongïalam ka party. Kane ka jingpynlong jingpynkup burom ka BJYM ïa u Bah MH Kharkrang ka paw ba ka tiket BJP na North Shillong la i thikna ba un ïoh ma u ïa ka tiket BJP.
Ka jingwan shim bynta ki nongïalam ka BJP na State Level ka nang pynskhem shuh shuh ïa kane namar kumba long mynta ha North Shillong ka don ka jingïaknieh tiket hapdeng u Bah MH Kharkrang, u Martamlin Pyrbot, u Bah Michael Kharsyntiew katba ki arngut kiwei pat ki la ryngkoh noh na ka sem BJP ba kynthup ïa u Bah JA Lyngdoh, Bah Rocky Hek namar ka jingbym sngew thikna ïa ka jingïoh tiket na kane ka seng.
Ha kane ka sngi ba ka BJYM ka la pynlong jingïalang ha U Soso Tham Auditorium la ïohi ruh ka jingshim kaba shitrhem na ki paidbah nongshong shnong ka North Shillong naduh ki tymmen haduh ki samla samhoi.
Haba kren ha kane ka sngi U Bah MH Kharkrang u la ong ba ka jingrung jong u sha ka jylli saiñ pyrthei ka long ban pynkylla dur ïa ka jylla naduh ka koit ka khiah, ka pule puthi, ka ïohkam ïoh jam bad kiba bun bah ki mat kiba kum ki nongshong shnong ka jylla ki angnud.
U la ong ruh ba kumba long mynta ka jingïakhun ilekshon ka la paw jakhlia bad i saitmet shaba palat ha kaba ki kyrtong ki thied beit da ka dor wat tang ban wan shim bynta sha ka jibngïalang jong ki ki seng bad ki kyrtong ki pynlut bun bun hajar ka pisa
U la ong ruh ba kumba naduh ki sngi kiba u dang dei u shakri sorkar haduh mynta hi um shym la pynïapher ïa kino kino ki briew na ka jinglong jaidbynriew jong ki.