Kylla ktem kaikhlaw ka jaka ban tei ïa ka Medical College ha Tura, kynnoh u MLA ka NCP

By Mawphor Editor On Sep 16, 2022

Shillong, Nailur 15 : U MLA ka NCP na Gambegre, u Saleng A Sangma ha ka sngi Palei u la kynnoh ba ka jaka ba ka jingtrei ïa ka Tura Medical College ka don mynta ka kylla long pynban ka ktem jong ki kaikhlaw.
“Ha ki khyndiat bnai mynshwa, nga ïoh jingtip ba ki don haduh kumba 70 ngut ei ei ki kaikhlaw bym lah ban tip ki la don hanngtei,” ong u Saleng ha Iing Dorbar mynta ka sngi Palei. U La buh jingkylli ruh ba la ka sorkar ka ïoh neem ïa ki jingtip haba ïadei bad katei ka jaka ba don ka projek, kaba lada ym don ba peitngor ka lah ban kylla long ka ktem na bynta ki kam runar.
U Myntri ka tnad ka Koit ka Khiah, James K Sangma haba jubab u la ong ba haduh mynta um pat ïoh jingtip eiei halor kane. Hynrei u la kular pat ba ka tnad Kampohiing ka jylla kan sa tohkit bniah halor kane. U Myntri u la ong ruh ba kadei ka thong jong ka sorkar ban pyndep ïa katei ka projek.
“Ngi la dep ban thaw ruh ïa ka komiti ba khlieh da u Secretary ka tnad ka Koit ka Khiah ban peitngor ïa ka jingtrei bad ka jingïaid ka projek,” u la ong bad bynrap ba ka kam mynta ka la ïaid 33 persen.
Da kaba pyntip shaphang ka dor ba mang na bynta katei ka projek, u Myntri u la ong ba ïa katei ka jingtei la mang 243.82 klur kadei kaba la kyrshan da ka sorkar pdeng ha kaba ka bhah ba ki ïoh na ka, ka long 70 persen ne 172 klur. “Haduh mynta 41 klur la dep ban pynlut kaba long 17 persen,” ong u James.
La pyntip ruh ba ïa ka por ba la buh ban pyndep ïa katei ka projek kadei ha u Kyllalyngkot 2021 hynrei na kiba bun ki daw, kynthup ïa ka khlam COVID, ka kam ka la shah ktah bad pynthut lut.
“Kumta, kumba pan por da ka kompeni ba pyntrei, ngi la rai ban pynjlan ban pyndep ïa katei ka projek haduh u Rymphang 2023.” Halor ka jingkylli ba wanrah da u MLA ka Rangsakona u Zenith Sangma ba lano katei ka jaka pule doktor kan sdang, u Myntri u la ong ba ki don shibun ki jingeh bad kumta un ym pat lah ban ai ka jingtip kaba tikna.
Haba ïadei pat bad ka Shillong Medical College u Myntri u la pyntip ba hadien ka jingpyndam noh ïa ka MoU, ka sorkar ka la khot noh da ki kynhun ba thymmai ban pyntrei ïa katei ka projek ha ka PPP Mode. U la pyntip ruh ba ka sorkar ka la mang 50 akar ha New Shillong Township kum ka jaka ba thymmai ban tei ïa katei ka projek.