Shillong, Nailur 15 : Sa shisien mynta ka sngi u Lamphang ka ïing Dorbar u bah Metbah Lyngdoh bad u Symbud Myntri Rangbah bah Prestone Tynsong ki la thalaiñ biang ïa u MLA ka North Shillong Constituency u bah Adelbert Nongrum halor ka jingdawa jongu khlem kino kino ki kyndon aiñ hynrei tang da ka jingïatip lem jong u Lamphang ban shah ïa u ban wanrah ïaka Resolution kaba ym don ha ka list ne ki mat jingïakren hapoh ka ïing Dorbar mynta ka sngi ha kaba ïadei bad ka Roster System.
Ha ka jingshisha ïa kane ka mat Roster System jongu la buh ban ïakren ha ka Sngi Balang hynrei namar ba la kut noh ka por Shong Dorbar kumta ym shym la lah ban ïakren ha katei ka sngi.
Haba u la pan bor na u Lamphang ban wanrah ïa kane ka mat mynta ka sngi u Lamphang u la ong “ Na kaei ka kyndon pynïaid ïing dorbar phi lap bad kyrpad ban shah ïakren ïa kane ka mat haba tang ha ka list ba mynta ka sngi ruh kam don”? u bah Adelbert u la ong “ Tang lyngba ka jingsngewthuh jongnga bad ka jingïatip lem”.
U Lamphang u la ong “Ka Business Advisory Committee (BAC) ka la dep pynskhem ïaka Calender List bad ka la buh por ruh ba ym lah ban pynjlan ïa ka jingïashong dorbar palat iak a 2 baje nohphai sngi hynrei wat la katta na ka bynta ka jingmyntoi jong baroh nga dang ïai pynjlan hi ïa ka por shong dorbar hynrei palat ban ïa kaba la buh da ka BAC ngam lah ban ïai pynjlan katba nga mon”.
Wat la u Lamphang ula pynshai haduh katne na ka liang u bah Adelbert u ïai pynbor beit ïa u Lamphang bad dei ha kum kane kapor ba u Lamphang u la ong ïa ka ïing Dorbar hap ban pynïaid kat kum ki kyndon aiñ pynïaid Dorbar bad ki dkhot ki dei ban sngewthuh ïa kata ba ïa ka list ban ïakren mynta ka sngi hapoh ka ïing dorbar la buh ha ka miej jong baroh ki dkhot ne MLA. Halor kane u bah Adelbert u la ong ba u ieh ha ka jingstad jong u Lamphang.
Halor kane ka jingleh jongu bah Adelbert mynta ka sngi u myntri ka tnad Parliamentary Affair u Symbud Myntri Rangbah bah Prestone Tynsong u la ïeng bad ong “ Balei ba bah Adelbert u hap ban ïai pynbor ne ïai kyrpad haba ïa ki list ban ïakren mynta ka sngi la dep buh ha ka miej jong baroh ki MLA.
U bah Prestone ula kyrpad ruh ïa u Lamphang ban pyndam ne weng lut ïa baroh ki jingkren jong u bah Adelbert na ka jingbuh record ne Proceeding of the House ban pynthikna ba kum kane ka jingjia kam dei ban dang ïai jia hadien habud bad ba kan ym wanrah kano kano ka jingkulmar hadien habud ruh. “ ïa baroh ki jingkren jong u bah Adelbert dei ban weng bad pyndam noh namar ki long pyrshah ïa ka list jong ki mat jingïakren hapoh ka ïing dorbar thawaiñ ba la buh ha ka miej jong baroh ki dkhot. Namar lada phi ïeng pyrshah mut phi dei u bym kwah ban bud pyrkhing ïa ki kyndon aiñ pynïaid dorbar” ong u Symbud Myntri Rangbah.
