Jowai, Nailur 15: Ka Hynñiewtrep Integrated Territorial Organization (HITO) Laskeiñ Area mynta ka sngi hapoh ka jingïalam u President u Nimainki Lyngdoh bad u General Secretary u Richandmi Syngkon kila leit ban ïakynduh ïa u Executive Engineer ka PWD Shangpung Division, ban dawa jur naka ophis jong u ban maramot noh ïa ki surok shnong hapoh ka shnong Laskeiñ bad ki shnong ba marjan.
Ha kane ka jingïakynduh naka liang u Engineer ula kular ban ïarap ban maramot katba lah kat ka bor jong u kum u Engineer uba peit ïa katei ka thaiñ bad u la ong ruh ki don Shibun ki Surok kiba hap hapoh ka Division jong u kiba dei ba maramot hynrei naki daw jong ka jinghiran pisa jong kane ka sorkar ym lah ban leh ka kum ka jingkwah bad jingangnud jong ki paidbah.
Hynrei na ka liang jong u EE ula kular ïa ki nongïalam ka seng ba yn pyrshang ban leh ïa kane kat kum ka bor khnang ban lait naki jingthut ka leit ka wan u paidbah ka thaiñ.
