Jowai, Nailur 15: Ka Society for the Study of Law West Jaiñtia Hills, Jowai mynta ka sngi kala pynlong ka jingïaphylliew jingmut lang ha Chutwakhu Indoor Sports Hall Jowai, halor ka jingdawa ban don noh da ka National Law School hapoh ka Ri-Lum Jaiñtia ba la pynlong
Ha kane ka jingïalang la wan ban ïadonlang naduh ki riew rangbah jong ka sor Jowai, ki Waheh Shnong, ki seng bhalang kum ka JSM, JSU, KSU bad FKJGP lem bad ki samla synrang kynthei.
Da kawei ka sur kila shim ïa ka rai ban thaw ïa ka kynhun bala tip kum ka “National Law School, Demand Committee” Jaiñtia Hills kaba kynthup ïa baroh ki dkhot ka EC ka Society, arngut shisien na ka JSU, JSM, FKJGP, ka KSU Jaiñtia Hills, President bad Secretary ka Synjuk Waheh Chnong Ri-Lum Jaiñtia, President & Secretary Synjuk Rangbah Chnong Jowai, kiwei de ki riew rangbah kata u ma S.K. Lato, ma Chel Singh Langi, ma Damehiwot Pde, ma Philanderwel Lyngdoh, ma H. Toi bad u ma Dr Phervision Nongtdu.
La ïathuh ba kane ka kynhun kan ïaid beit shakhmat ha ka jingtreikam jong ka ban dawa na ka sorkar ba kan buh beit ïa ka National Law School hapoh ka Ri-Lum Jaiñtia.
Kum ban shu pynkymmaw ka Society kala dep ban phah kopi ïa ka Memorandum sha ka sorkar jylla halor ki jingdawa ban buh ïa ka National Law School ha Ri Jaiñtia kaba ïa ryngkat kyrdan bad kiwei de ki skul kiba don hapoh ka Ri India hynrei haduh mynta ka sorkar kam shem la sngap satia ïa ka jingdawa.
Kumba long mynta wat hadien ba ka jingdap 50 snem ka jylla, ka Ri Jaiñtia kam shem la ïoh ïa kawei ruh ka State Level ne ka National Education Institution. Ban pynur ïa kane ka jingdawa ka jingïalang kala thaw syndon ïa kane ka “National Law School, Demand Committee” Jaiñtia Hills.
