Nongpoh, Nailur 15: Uwei na u samla ba don ka jingthut ha ki dkot met bad uba ym lah ban ïaid ban ieng kum kiwei pat ki ba biang ha ka met ka phad, u Samla Pairing Pale kum uwei na u rangbah ba don ka jingduna dkhot met u la buh ka jingkyrpad sha ka sorkar jylla ba kan phai khmat lem sha ka jingeh jongki, kaba ki ju ïa kynduh kum kita kiba don ka jingduna ha ka dkhot met.
Une u samla uba la mih ban kren lem ïa ki jingeh jong kito kiba don ka jingduna dkhot met ha Ri Bhoi bad ha ka jylla hi baroh kawei, u dei u samla Pairing Pale na ka Shnong Umpowin ha Ri Bhoi District.
Haba kren sha ki lad pathai khubor, u samla Pairing Pale u la kren bynniaw ba haduh kine ki sngi, ka sorkar jylla kam ju phai satia sha ka jingeh jong kito kiba don jingduna ha ka dkhot met bad kane ka jingbym phai khmat ka sorkar sha kiba don ka jingduna ha ka dkhot met ka la pynduh mynsiem ïa kiba bun kito kiba don ka jingduna ha ka dkhot met ha kaba ha kine ki sngi kyrduh kam kyrduh jam ki shem jingeh ban kyrshan na lade ïa lade bad ban shu shaniah tang ïa ka ing ka sem jongki.
Ki mat lane ki phang kiba une u samla u la kren na ka bynta ka jingeh kiba duna dkhot met ki kynthup naduh ka jingthungkam thungjam bad ki lad jingïarap ba ka sorkar ka dei ban phai khmat khnang ba ma I ruh kin lah ban im ka jingim kumba long lem kiwei kiba biang ha ka liang ka dkhot met. “Hooid ka sorkar ka ïarap na ka bynta ka bai bnai kaba long tang T. 500 shi bnai bad kane kam lpat biang na ka bynta ka jingdonkam jongki” ong u samla Pale bad bynrap ruh ba lada ka sorkar ka don kata ka mynsiem ban phai khmat kyrpang ka la hap ban thaw ki lad ki lynti kumno ban ïarap kyrpang la ka long ha ka liang ka thungkam thungjam bad ki lad jingïarap kiba kyrpang khnang ba kin ïa bit ïa biang lang kumba long lem kiwei” u la bynrap.
Namarkata, na ka liang une u samla u la kyrpad jur ïa ka sorkar bad khamtam ki nongmihkhmat bad ki myntri sorkar ba kin shim khia lem ban peit ïa ki jingeh jong kito kiba don ka jingduna ha ka dkhot met bad dei tang ka sorkar kaba lah ban thaw pyrthei da kaba kan pyrkhat kyrpang khnang ba kum kita ki nongshong shnong ka jylla kiba don ka jingduna ha ka dkot met kin nym duh jingkyrmen ha ka jingim haba ki ioh ïakita ki song jingïarap ba kyrpang ba kin ïaid kin ieng ne im lang kumba long lem kiwei, u la bynrap shuh shuh.
