Jowai, Nailur 15: Ka jingdon jong ka Dispensary kum ka jaka ai dawai haka shnong Barato West Jaiñtia Hills District kaba don ha ‘U Khrist Syiem Barato Parish’ kala long ka jingmyntoi kaba khaw eh ïa ki paidbah nongshong shnong ha kitei ki thaiñ kiba donkam jingïarap haka liang ka koit ka khiah.
Ïa kane ka Dispensary la ïarap ban wad pisa lyngba ka Society of St. Vincent de Paul, Jowai Area Council bad dei da ka jingshimkhia jong u MDC ka thaiñ u ma Aiborlang Shadap lyngba ka skim SAG jong ka JHADC la lah ban plie paidbah ïa ka ha ka 26.02.2022
La ïathuh ba kane ka jaka ai dawai kala ïaid lynti tang hapoh 7 bnai hynrei kala lah ban ai jingsumar ïa kiba wan shim dawai na ki shnong bapher bapher kaba la kynjoh sha ka 5526 ngut, la ïathuh ka Sister kaba dei peit ïa ka Dispensary ka Cecilia F Basamotang.
U Woh M.M. Thaiang uba dei u President ka Society of St. Vincent de paul, Jowai Area Council ha la jingleit jurip ïa kane ka Dispensary hynnin ka sngi 14 tarik, ula ai ka jingïaroh ïa ka Sister kaba la trei shitom ban pynïaid shakhmat ïa kane ka Dispensary. Ula ong ba ka jingdon kane ka jaka ai dawai kala long ka jingmyntoi kaba khraw eh ïa ka shnong Barato bad kumjuh ïa ki shnong ba marjan.
