Wan balai ka Meghalaya ha ka jingshah thombor ki longkmie, ong u MLA ka Liang Pyrshah

Shillong, Nailur 14 : Ka Meghalaya ka wan ha ka kyrdan kaba lai na ki jylla ha ka thaiñ shatei lam-mihngi jong ka Ri haba ïadei bad ka jingdon bun ki jingjia thombor pyrshah ïa ki lonkgmie bad ha ka kyrdan kaba ar pat haba ïadei bad ka jingshah thombor ki khynnah rit, ong u Chief Whip ka Liang Pyrshah, Bah George Lyngdoh ha Iing Dorbar ha kane ka sngi Balang.
Haba rah ïa kane ka mat ïatai haba ïadei bad ka jingshngaiñ ki nongshong shnong ka jylla, utei u nongmihkhmat u la pyntip ba kitei ki jingkhein baroh kidei kiba u la ïoh lyngba ka National Crime Records Bureau (NCRB).
U la pyntip ruh ba na ki 558 tylli ki jingjia thombor pyrshah ïa ki longkmie kiba la jia ha u 2019, haduh 568 tylli ki dei ha u 2020 bad 685 ha u 2021. Haba ïadei pat bad ki khynnah, ka jylla ka la don haduh 481 tylli ki jingjia ha u snem 2021, 379 tylli ha u snem 2019 bad 415 tylli ha u snem 2020. Shuh la ong ruh ba ka jylla ka la don haduh 385 tylli ki jingjia shah thok ha ki kam ba dei bad ka pisa (economic offenses) ha u snem 2021.
“Ka la don ka jingkiew haduh 22.7 persen ki kam thombor ïa ki longkmie bad haduh 27 persen pat ha ki kam thombor pyrshah ïa ki khynnah naduh u snem 2019. Kine ki jingkheiñ ki kdew ïa ka jinglong jingman ha ka jylla,” ong u Bah George.
Utei u nongmihkhmat na Umroi u la kyntu ruh ïa ka sorkar jylla ba kan shim ïa ki lad ki lynti ban pyntikna ba ïa kum kitei ki kam thombor dei ban peitngor bad ruh ba ki runar ki dei ban ngat ha ki kyndon jong ka aiñ.
Da kaba kynnoh pat ba ïa ka jingdon jingem jong ka jylla la lute lut, u Bah George u la buh jingkylli ruh halor ka jingdonkti ki ‘high level’ ban pynïaid ïa ki trok ba kit ïa u dewïong beaiñ. “U Myntri Ragnbah u la kam ba ki trei wat mynmiet ruh ban tehlakam ïa kane ka ishu jong ka jylla.. hynrei kumno pat shaphang ki kam beaiñ kiba ïai jia. Hato ka sorkar jylla kan shim ïa ka jingkitkhlieh ba kaei kaba ngi leh, dei ban leh ha ka lynti kaba shai” Ngim lah ban ban leh ei ei haba rieh ha pdeng jong ka miet,” u la ong.
U kdew ruh ba ka jingpynslem ban thungkam ïa ki pulit ka la ktah wat ïa ka jingtreikam jong ka tnad pulit. Da kaba kdew ruh ba ka mat wan rung kyrthlep kiba nabar kadei kawei pat ka mat kaba ktah, utei u nongïalam ka Liang Pyrshah u la ong ruh ba ki don ki khubor ba ki paidbah ki ïohi ïa ki Rohingya ha nongbah Shillong. Kumta, u la kyntu ba ka tnad syntiat jong ka Ri kadei ban pynkhlaiñ lada dei ba ki don shisha kum kitei ki jingwan rung ki briew kiba nabar.