Shillong, Nailur 14 : U Myntri ka tnad PWD (Roads) ba dei ruh u Symbud Myntri Rangbah ka jylla, Bah Prestone Tynsong mynta ka sngi Balang u la pyntip ba ka tnad ka la pynkhreh mynta ïa ka Detailed Project Report na kabynta ban pynheh bad pynïar noh ïa ka surok Maw-phlang sha Mawsynram.
“Ngi la rai ban pynheh bad pynkylla noh ïa ka sha ka surok Intermediate, kumta tang shu dep ïa ka DPR yn sa mang tyngka noh,” ong u Bah Prestone haba jubab ha Iing Dorbar Thawaiñ ka jylla halor ka jingkylli ba wanrah da u MLA ka Mawphlang, Bah Eugeneson Lyngdoh.
Da kaba kdew ba katei ka surok kadei kaba donkam bha na kabynta ka West Khasi Hills kumjuh ruh na ka bynta ka South West Khasi Hills, u la ong ba ka jingpynheh kan sdang naduh Ladmawreng ter ter shaduh Weiloi kaba don kumba 25-16 KM. U la pyntip ruh ba tang shu dep ka kam kin mang tyngka noh bad ka tnad kan sa khot tender ban sdang noh ïa ka kam.
Ha kajuh ka por u Symbud Myntri Rangbah u la kular ruh ba un sa peit ïa ka jingdawa ba la pynsngew da u MLA ka Mawsynram, Bah HM Shangpliang haba ïadei bad ka jingpynheh ïa ka surok na Weiloi ter ter shaduh Dangar-Balat.
Shwa kane, utei u MLA u la ong ba ka surok na Mawphlang sha Balat kadei ka surok kaba la rim tam naduh ka por jong ka sorkar Assam bad kumta ka donkam ïa ka jingkhmih bniah jong ka sorkar.
