Shillong, Nailur, 14: Ka All India Trinamool Congress kaba shong ha ka Liang Pyrshah jong ka Iingdorbar Thawaiñ ka la dawa ïa ka Sorkar Meghalaya Democratic Alliance (MDA) ba ka dei ban thung da ka jingtohkit ba laidluid ban tohkit biang halor ka jingshah siat ïap jong u Bah Cherishstarfield Thangkiew ha ka jingleit khynra jong ki Pulit ïa ka ingsah jong u ha Mawlai Kynton Massar ha ka step phyrngab ka 13 tarik u Nailar, 2021.
Ha ka sngi sdang jong ka Dorbar Synrai ka Iingdorbar Thawaiñ ka Sorkar ka la wanrah ïa ka kaiphod tohkit jong u Nongbishar ba la shongthait u Juctice T. Vaiphei. Hynrei ka la mih ka jingpyrshah na ki kynhun sengbhalang kiba la dawa ban sei madan ïa ki kyrteng jong ki Pulit kiba donkti ban siat ïap ïa u Bah Cheris namar ka jingbym bun ïa ka kaiphod.
U MLA jong ka Trinamool Congress u Bah George B. Lyngdoh haba wanrah ïa kane ka mat ha ka Short Discussion Hour ha ka Iingdorbar Thawaiñ, la ong, “ha ka sngi sdang jong ka Dorbar Synrai, ka Sorkar ka la wanrah ïa ka kaiphod tohkit halor ka jingshah siat ïap jong u Bah Chesterfield Thangkhiew. Lah ban shu shim kyllum na ka kaiphod tohkit ba ka don ka jingleh bym pyrkhat bad ka jingpyndonkam palat pud ïa ka bor.”
U la buh jingkylli shuh shuh da kaba ong, ‘ki paidbah ki dawa ïa ka hok da kaba pynshitom ïa kiba donkti. Ki paidbah ki ïai buh jingkylli ïa ki bor ba dei peit ba mano ba phah ïa ka kynhun (ki Pulit). Hato ka dei ka jingïasylla ha lyndet ka jingsiat ïap ïa u Bah Chesterfield Thangkhiew? Kum ka Liang Pyrshah ngi dawa ba dei ban thung da ka jingtohkit ba laitluid ban lap ïa kiba donkti bad ïa ka jingthmu ha lynti ka jingshah pynïap jong u Bah Chesterfield Thangkhiew.”
