Yn shim rai khatduh ka KHADC ba kular u CM ba ka CrPC bad CPC kan ym ktah ïa ka bor ki kashari District Council

Shillong, Nailur 14 : Ka Khasi Hills Autonomous District Council (KHADC) shen kan sa shim ïa ka rai kaba khatduh ha kane ka sngi Palei hadien ba ka sorkar jylal ka la ïai ban ba ka jingpynbna ba ka pynmih dang shen haba ïadei bad ka CrPC bad CPC kan ym ktah satia ïa ka bor bad ka iktiar jong ki Kashari District Council.
Ïa katei ka rai ki la shim hadien ka jingïakynduh lang hapdeng u Myntri Rangbah ka jylla Conrad K Sangma bad ka kynhun na KHADC hapoh ka jingïalam jong u Chief Executive Member (CEM) ka KHADC Bah Titos W Chyne ha Secretariat ha kane ka Sngi Balang.
Haba kren bad ki lad pathai khubor, u Myntri Rangbah u loa ong ba ka sorkar jylla ka la ai ka khubor kaba shai sha ka District Council ba ka jingwanrah ïa katei ka notification ka long ban ailad ïa ki Judicial Magistrate ba kin bteng ïa ka kam jong ki kaba ju leh da ki ADC Judiciary ha kapor ba ka Judiciary bad ka Executive kim pat shah pynïakhlad.
“Dei tang kata hi ka jingmut jong kane ka notification bad ymdei palat ïa kata bad ka jingkylli ban ong ba kan ktah bad sloit noh ïa ka iktiar jong ka District Council lane ban tuklar noh ïa ka bor jong ki kashari ha ki shnong lane pynkylla ïa ki kyndon ha ki Ditrict Council kan ym don satia,” u la ong.
Da kaba kam ba ka bor jong ki District Council ki la don ha ka jingïada katkum ka Riti Synshar jong ka Ri, u Myntri Rangbah u la ong, “Ka jingïada kaba kongsan tan ba ka District Council lane ki Kashari jong ki ka long lyngba ka kyndon (Provision) jong ka Para 4 & 5 ha ka Khyrnit kaba Hynriew bad kumta ym don ka notification kaban tam ïa ka.”
Halor ka jingsngewkhia ba la wanrah da ka KHADC haba ïadei bad ki mukotduma para riewlum, u Myntri Rangbah u la ong ba ka sorkar jylla ka la dep kren shaiba kam don satia kata ka jingkylli banpynkynriah noh ïa ka kam ba takhuh u riewlum pyrshah ïa u riewlum namar katkum ka para 4 jong ka Khyrnit kaba Hynriew kum kitei ki mukotduma yn hap ban leh da ki Kashari jong ki District Council.
Hadien kane, u CEM u la pyntip ruh ba ka KHADC kan sa kynduh biang la shai ka sngi Palei ban shim ïa ka rai kaba khatduh haba ïadei bad katei ka jingkynduh hynne ka sngi.
U la kubur ruh ba ka sorkar jylla ka la kren shai ba katei ka notification kan ym ktah satia ïa ki Kashari jong ki District Council, subordinate court lane ki village court.