Nongpoh, Nailur 14: Lada lah shisha ban pyntreikam thik kumba la thmu lyngba ka ‘Ginger Processing Unit’ kan long shisha ka jingkyrkhu na ka bynta ki nongrep Sying ha Ri Bhoi, namar na ka liang ka sorkar jylla lyngba ka Meghalaya Basin Development Agency (MBDA) ka la mang tyngka sha ki Cooperative Society ban shna ïa ki Ginger Processing Unit kum kawei na ka thong ban kyntiew ïa ka ioh ka kot ki nongrep ha ka jylla.
Kum ban pynpaw paidbah, ka Ri Bhoi District ka dei kawei na ka District kaba ki nongrep ki ju pynmih bun ïa u Syieng ha kaba ïa u Sying la shalan shabar ka jylla bad la jin ba treikam kata ka Ginger Processing Unit kan ai jingmyntoi shisha kaba khraw ïa ki nongrep Syieng ha Ri Bhoi bad ha ka jylla hi baroh kawei.
Haba kren halor ka kam rep sying ha Ri Bhoi, kiba bun ki nongrep ki ju trei shitom ban kyrshan ïa ka ing ka sem da kaba rep sying bad teng teng pat ki nongrep sying ki shah ktah na ka daw ka jinghiar dor u Sying ha kaba teng teng ki hap ban die ha ka dor kaba tad ba ki nongkhaii ba na shabar ki shim kabu ïa ki Nongrep Sying.
Kumba la ioh lum jingtip da u Mawphor, ki la don ki nongrep lyngba ka kynhun Cooperative Society ki don ka jingkyrmen ban kiew ha ka ioh ka kot, ha kaba lyngba ka sorkar jylla lyngba ka tnad Meghalaya Basin Development Agency ka la shim khia ban ai ïa ki song jingïarap na ka bynta ban kyntiew ïa ki Cooperative Society lyngba ka ‘Ginger Processing Unit’ da ka jingthmu ban pyndonkam hi ïa ki sying ban shna ha kiba bun rukom (Finished Product) ban pynïaid iew pat khnang ba kane kan ai jingmyntoi ïa ki nongrep sying ha Ri Bhoi bad ha ka jylla hi baroh kawei.
Napdeng kiba bun ki Cooperative Society kiba la ioh ïa kane ka Ginger Processing Unit ha Ri Bhoi, ka Mawlong Nongtluh Integrated Cooperative Society ka dei kawei ruh na ka kynhun kaba la ioh ïa kane ka lad jingïarap na ka Meghalaya Basin Development Agency ban shna ïa kane ka Ginger Processing Unit.
Kumba la ïathuh da uwei na u dkhot katei ka Cooperative Society, u Bah Swarlin Dkhar, u la ong ba ka Mawlong Nongtluh Integrated Cooperative Society ruh ka dei kawei na ka Society kaba la ioh ïa kane ka Ginger Processing Unit bad kane ka Society ka khmih lynti ba kan ioh jingmyntoi na kane ka Ginger Processing Unit ban myntoi ki nongrep sying ha katei ka thain bad ha ka District hi baroh kawei.
U la ïathuh ba na ka liang ka Society ka la sdang ban pyntrei ïa kane ka projek ha kaba na ka Meghalaya Basin Development Agency ka la mang haduh Rs. 19 lak na ka bynta ki kor ki bor, Rs. 5 lak na ka bynta ka Collective Marketing Centre bad Rs. 7 lak na ka bynta ka Solar Cold Storage Centre.
Shuh shuh, u la ong ba ka Society kan pyrshang ban pyntrei janai ïa kane ka Ginger Processing Unit bad ka Society ka khmih lynti ba lyngba kane ka projek kan ai jingmyntoi ym tang ïa ki dkhot ka Society bad kan ai jingmyntoi khamtam na ka bynta ki nongrep sying ha Ri Bhoi, ha kaba lada lah shisha ban leh kumba la thmu kan long ka jingmyntoi ïa ki nongrep sying ha Ri Bhoi, u la bynrap.
