‘Ban lait na ka shong Syier ha Shnong’ dawa set along shi jingim ïa u Tell Me Pyrtuh

Jowai, Nailur 14: Ka Dorbar shnong Namdong-B lem bad ka ïing ka sem jong u Tell me Pyrtuh mynta ka sngi kila pynlong ïa ka jingïamih paidbah ban dawa na ka sorkar ‘ban set along shi jingim ïa u Tell me Pyrtuh’ ba ju khot sin u (Bor Pyrtuh) ba donkti ha ka kam pynïap briew, khnang ba kane kan lait na ka jingshong syier hapoh ka shnong ka thaw.
Ha kane ka jingïalang la pynlong ruh ïa jingïaid Rally ha ryngkat ki jingthoh pynrem haki placard bad ki banner, ba la shim bynta da ki hajar ngut ki paidbah nongshong shnong ka thaiñ Nartiang Khanduli ba kynthup ïa ka Joint Action Committee (JAC) Nartiang Khanduli Area, ki khynnah skul ki nonghikai na ka shnong Namdong, ki Waheh Shnong lem bad kiwei de.
Kine ki nongshong shnong kila dawa na ki bor ka aiñ ba kin pynshitom da kaba rai pynrem ïa utei u runar u Bor Pyrtuh uba dei u nongshong shnong ka shnong Namdong-B, uwei naki 4 ngut ba shah kem uba donkti ban pynïap ne shim ïa ka jingim jong ki ar ki nongniah kali kamai ha kine ki bnai bala dep.
Ka kmie jong u Bor Pyrtuh ka kong Soiloda Pyrtuh kaba la ai jingkren ryngkat ka jingsngewsih ïa ka jingleh jong u khun, kala ai ka jingkyrshan ba pura ïa kane ka JAC bad Shnong Namdong, kaba la ong watla ka long kum ka kmie jong u ruh kam banse shuh ban pynrem ïa u khun jong ka namar ki kam runar jong u ki la long pyrshah ïa ka imlang sahlang bad ka dawa jur na ki bor jong ka aiñ ba ka dei ban set shi jingim ïa u. Halor kane wat na ka liang ka kur ruh kala pynrem jur ïa kane ka kam pynïap briew jong u Bormi Pyrtuh.
U ma Damian War uba dei u Waheh Shnong Namdong, ula ong ba ka jingleh jong kine ki riew thrang snam ka pynsyier ïaka ri bad ka jaitbynbriew khamtam ki nongshong shnong sha kane ka thaiñ ki bym juh don ka jingtieng jingsyier wat lada sahmiet ha ki lynti syngkieng ruh, hynrei dang ha kine sngi mih pynban kum kine ki jait briew kiba la shim syndon ïa ka jingim jong ki ar ngut ki samla ba lui lui.
Ha kane ka sngi la ïoh ruh ki jingkren na ka liang u President ka KSU Nartiang Circle u samla Chanbor War, u Waheh Shnong ka Moodop Nartiang u Damon Dkhar, U General Secretay KSU Lapangap Unit u Augustang Timung, na ka liang ka kur da u Mantre Pyrtuh, ki nongniah kali kamai ka thain kumjuh naki Waheh Shnong bapher bapher kiba don hapoh ka JAC Nartiang Khanduli, ki longkmie bad kiwei de, katba ïa ka jingïalang la pynïaid da u ma Icydol Pakma.
Kane ka Joint Action Committee (JAC) Nartiang Khanduli Area ka buh ka jingkyntu ïa ka tnad pulit ba kam dei ban kheiñ sting ïa ki bor pahara ha ki jaka set koidi, namar na ka por sha ka por kane kala wanrah ïa ka jingteng jingsmiej ïa ki paidbah na ka jinglait phet ki runar kumba ka jia ha kine ki sngi ba ladep haduh bala wanrah ka jingshah bom ïap ïa ki saw ngut ki koidi ba la shah rai pynrem.