Nongpoh, Nailur 14: Ki paidbah jong ka thaiñ Marmaiñ kiba leit ba wan lyngba u surok Nongpoh-Umden-Sonapur (NUS) ki hap ban mad ka jingeh kaba khraw haka leit ka wan kaba lah ruh ban buh jingma bad wanrah ki jingjia ba sngewsih ïaka leit ka wan jong ki paidbah hadien ka jingtwa khyndew ha kine ki sngi namar ka jingther u lapbah.
La ong ruh ba katei ka jingtwa khyndew kala pynlong ïa utei u surok ban ktieh shaba palat bad buh jingma ïaki kali ba leit ba wan namar ka jingbtuid jong ka lynti bad ka jingktieh jong u surok na katei ka jingtwa khyndew.
Katto katne ki Rangbah Shnong kila pyrshang ban pyntip ruh sha ka tnad PWD halor katei ka jingeh ba ki paidbah ki ïakynduh hynrei haduh mynta ym don ba patiaw da ki bor ba dei peit, ha kaba naka liang ki nongïalam shnong ki buh ka jingkyrpad sha ki bor ba dei peit ba dei ban shimkhia ïa katei ka jingeh jong ki paidbah na ka bynta ban pynkhuid noh ïa kitei ki khyndew ba la twa ha katei ka surok iaid paidbah.
