La pyllait haduh 24.160 klur ban shna pynbha noh ïa ka surok RBJJ kaba dei ka surok ha ki thaiñ khappud

Khliehriat nailur 14: U Chief Engineer jong ka tnat Public Work Department (PWD-Roads) hynnin ka sngi u la khot da ka Online Bids kaba long kum ka jingkhot ban thep tender, na ka bynta ban shna pynbha ne maramot noh ïa ka surok Rymbai-Bataw-Borghat- Jalalpur (RBBJ-Road) kaba dei ka surok ha ki thaiñ khappud ha East Jaiñtia Hills District.
Na ka bynta ban maramot ïa katei ka surok ka Central Road Infrastructure Fund (CRIF) ka la bei tyngka, ha ka mang tyngka kaba T24.160 klur tyngka bad ïa kane ka mang tungka la dep pynbna naduh ka 30 tarik u lber 2022.
Ka jingpyntrei ïa katei ka surok kan long naduh ka 8/000 Kilo Mitar haduh 37/000 (Length=30.00KM) bad lehse kane ka jingpyntrei ïa kane ka surok kaba ha katei ka mang tyngka kan nym lah ban kot sha baroh kawei ka jaka jong ki shnong ha khappud namar kane ka surok RBBJ ka dei kaba pyniasoh ïa kiba bun tylli ki shnong ha khappud kiba kynthup naduh shnong Rymbai, Umsatai, Ladwah Wapung, Deiñsatlang, Pynurkba, Bataw, Umlynsha, Lakadong Umlatdoh, ka shnong Lama, Natbor, Borghat, Pdeiñwahkhynriaw, Demlakadong, Kwator, Hingaria ter ter, kiba dei ki shnong kiba don ha khappud bad ka ri Bangladesh.
Ka jingpynllait ïa ka mang tyngka bad ka jingpynbna u Chief Engineer ka tnat PWD ban shna pynbha noh ïa kane ka surok ka la wanrah jingkmen bad jing sngew phuh mut phuh mat ïa ki paidbah jong ka thaiñ khappud namar mynta la da ki bun bun snem kumba khatsan snem mynta ki paidbah ki la shuh shah jynjar da kaba ïaid ha ka surok kaba jot rathai kaba la long kum ka surok khlaw, kaba ju wanrah jingeh haduh katta katta ïa ki paidbah ka thaiñ khamtam ha ka por lyiur ba jur u slap bunsien ki kali kim ju lait shuh ban ïaid na katei ka surok ha khappud namar ba ka la jur sa tang ka jyrsieh, ka thliew ka syar bad kaba la buh jingma ruh ïa ka jingim briew.
Na ka liang ki Waheh Shnong bad ki nong shnong shnong jong kitei ki shnong ha khappud kiba dei ïaid lyngba na katei ka surok Rymbai-ki Bataw-Borghat- Jalalpur (RBBJ-Road) ki pynpaw ka jingsngew kmen bad sngew nguh ïa ka sorkar kaba la kloi ban sngap ïa ka jing ud bad jingkyrpad ki paidbah bad ha ka juh ka por ki la kyrpad ïa ki contractor ki ban shna ïa katei ka surok ba kin sngewbha ban maramot bha ïa ka surok ha ka rukom kaba paka bad kaba skhem bha khnang ba ka surok kan neh slem bad kumjuh ruh ba kan long ka jingkyrkhu ïa ka thaiñ hi baroh kawei namar kumba ngi tip ba ka surok hi ka dei u budlum jong ka roi ka kiew jong ka thaiñ khamtam ka thaiñ khappud ka dei ka thaiñ kaba ju pynmih buh bha ïa ki mar rep, kumta ka jingdon ki surok, ki lynti ki syngkieng kiba biang ba bit kan ïarap shi katdei eh ban pynsuk ïa ki nongrep ban pynpoi ïa ki mar rep sha ki jaka ïew bad kane kan ïarap ruh ha kaba kyntiew ïa ka ïoh ka kot jong ki paidbah ka thaiñ.
Ha kajuh ka por ki paidbah ka thaiñ, ki kyrpad bad khmih lynti ba ka sorkar kan pyrkhat ban thaw shuh shuh ki lad ki lynti ban ioh ban maranot syndon ïa baroh kawei ka surok ha katei ka thaiñ kaba dei ka surok Rymbai- Bataw-Borghat- Jalalpur (RBBJ-Road)