Leh burom ka 2 Megh BN NCC ïa u Kitborlang Lyngkhoi u Shipai uba la khlad noh
“Ha ka lyngkhuh sngi ïap ba 9 snem tam”
Mawkyrwat, ‘Nailur, 14: Ka kynhun jong ka 2 Meghalaya BN NCC hapoh ka jingïalam jong u Subedar Major 2 Meghalaya BN NCC, Shillong, u Keshab Paudel mynta ka sngi ki la ïoh ban leh burom da kaba wan buh syntiew ha u mot sah kynmaw jong uwei shipai uba dei na ka Shnong Nongbah Marshilong, South West Khasi Hills District.
Lah ban kdew ba kane ka jingleh burom jong ki ka long ruh kum shibynta ban kynmaw burom ïa ki shipai ïada ri kiba la len lade ïa lade na ka bynta ka Ri India ha kane ka jingdap 75 snem ka jingïoh laitluid ka Ri India ba la tip kum ka “Azadi ka Amrit Mahatsav”.
U shipai uba la khlad noh ba na ka liang ka 2 Meghalaya BN NCC u dei u Kitborlang Lyngkhoi. La kha ïa u ha ka 12 tarik u October, 1987 bad u la khlad noh ha ka 16 tarik u bnai Nohprah, 2012 ha ka jingjia 2012 ha ka jingjia shah tyllep ha u thah ha Jamu & Kashmir, Glaciers.
Ha kane ka sngi na ka liang ka 2nd Meghalaya BN NCC ki la ïoh ban ai ka khusnam ïa ka longïing jong u (L) Kitborlang Lyngkhoi bad ka jingkren lyngkot kum ka dak ka jingsngew lem bad kynmaw burom bad ïa ki kam ba u la trei ha ka kam mynba u dang sah ha kane ka sla pyrthei. “Watla u dei na ka shnong kaba na nongkyndong hynrei ymlah mutdur ba ki mih ki shipai kiba len lade na ka bynta ka Ri India baroh kawei ha kaba kane ka long ka jingsngewkmen namar watla u (L) Kitboklang Lyngkhoi u la khlad noh na ka ne ka sla pyrthei hynrei ka nam bad ka kyrteng kan ïai sah junom la junom ïa ki kam ba u la synñiang ïa ka ri India baroh kawei.
Ïa ka khana lyngkot jong u (L) Kitborlang Lyngkhoi la pule da u samla Meer Hussain CH, St. Anthony’s College, Shillong uba shong ha ka 3rd Semister jong ka English Department, ka jingkren lyngkot na u Subedar Major 2 Meghalaya BN NCC, Shillong, u Keshab Paudel bad na u Subedar 2 Meghalaya BN NCC, u Hento Taipodia.
Ha kane ka sngi la ïadonlang ruh u Subedar 2 Meghalaya BN NCC, u Hento Taipodia ha ryngkat ki lai ngut ki National Cadets Corp (NCC) jong ka St. Anthony’s College, Shillong lem bad ruh bad ki kmie ki kpa, hymmen ki para ryngkat kiba ha ïing ha sem jong u (L) Kitborlang Lyngkhoi.