Palat 200 ngut yn ïashim bynta ha ka Marathon ha Mawlynnong, 60 ngut na Bangladesh
“Yn don ruh ka nongmareh na Meghalaya kaba la 74 snem ka rta ka ban mareh ïa ka 21.1 Km. Nangta u khynnah ba dang 4 snem u ban mareh ïa ka 5 Km ban synranlang bad ka kmie. Lai ngut ki samla kiba don jinganna ki dkhot met, uwei u nongmareh ba don tang shiliang ka kjat na Kolkata u ban mareh ïa ka 12 Km.”
Mawlynnong, Nailur 14: Ka Mawlynnong, ka shnong kaba khuid tam ha Asia bad kaba la ioh iaka nam Best Eco Tourism Destination na ka magazine Outlook Travellers, haka 17 tarik mynta u bnai kan pdiang ia kawei na ki Marathon ba kham heh ha ka jylla.
Ïa kane ka Marathon yn pynlong daka Sportive India kum ka jingïaleh ban kyntiew ia ka kam shang pyrthei, nangta ban thaw ki lad ki lynti ban pynkiew ia ki kam shang pyrthei sha ka khappud bad ka Bangladesh ryngkat ka jingpyniadei paralok bad kumjuh ruh ban pynshlur ia ki samla ban iakhun pyrshah ia u drok.
Kane ka marathon kan don lai bynta, kata kaba 21.1 KM, 12 KM bad 5 KM.
Yn don palat 200 ngut ki nongïashim bynta na ki 9 tylli ki jylla ka ri India, nangta ki nong Meghalaya bad kumba 60 ngut na Bangladesh ki ban wan na Dawki.
Yn don ruh ka nongmareh na Meghalaya kaba la 74 snem ka rta kaban mareh ïa ka 21.1 Km
Nangta u khynnah ba dang 4 snem u ban mareh ia ka 5 Km ban synran lang bad ka kmie. Lai ngut ki samla kiba don jinganna ki dkhot met, uwei u nongmareh ba don tang shiliang ka kjat na Kolkata u ban mareh ïa ka 12 Km.
Ka jingmareh kan long beit na ka surok,. Nangta 2 jaka ba don ki mawlynti bad kumjuh ruh ka jingmareh na ka jingkieng thied dieng.
Ka jingmareh yn sdang na Mawlynnong, na jaka sangeh kali ha ka por 6 haduh 6:15 baje mynstep.Ia ki BIB Distribution yn sam ha ka 16 tarik.
Kan don ka bus na Shillong ha ka 16 tarik por 1:30 baje janmiet na Khyndailad bad ha ka 17 tarik pat na Mawlynnong sha Shillong. Kan don ka jingshim bai kali kaba bit dor.
Ïa kane ka Marathon la kyrshanlang da ka Meghalaya Tourism, Social Welfare Department, DC East Khasi Hills District, SDO (Civil) Pynursla, Dorbar Shnongs Mawlynnong, Nohwet Village, Rewai Village, Nongeitniang Village, Shillong Press Club.