Nongpoh, Nailur 14: Kum shi bynta ban ioh ban ïarap lem ban pynmih pisa na ka bynta ka Dr. H. Gordon Robert Hospital, Shillong, kaba dei ruh ka snem rakhe ia ka Centenary Celebration Jubilee mynta u snem 2022, ka Jingïaseng ïasyllok ki Pastor KJP Synod Sepngi kan pynlong ïaka Charitable Football Friendly Match hapdeng ki Pastor ka KJP Synod Sepngi pyrshah ïaki MLA, MDC bad ophisar sorkar ha madan ïalehkai jong ka Umroi haka 17 tarik mynta u bnai naduh ka por 1 baje noh phai sngi.
Ha katei ka jingïalehkai phutbol paralok yn ym don kano kano ka bai rung hynrei yn buh da ki synduk (Donation Box) ha man la ki khyrdop jong ka madan ba ki paidbah ba wan peitkai ki lah ban noh sngewbha katkum ka mon jong ki. La kyrpad bad wer sngewbha ia baroh ki paitbah ba kin sngewbha ban wan sakhi ïa katei ka jingïalehkai kum ka dak ka jingïasnohkti lang bad ban kyrshan lem ïa kane ka jingthmu ba bha jong ka Jingïaseng ïasyllok ki Pastor KJP Synod Sepngi , kane ka long katkum ka jingpyntip na u Rev. LP Nongkseh Chairman bad u B Jyrwa Pro Pastor ba dei ruh u Secretary ka Organising Committee Charitable Football Friendly Match, Ri Bhoi Zone.
