Shillong, Lber 30 : Ka erïong kaba jur bha ka la syllad naphang ïa bun tylli ki longïing kiba don ha ka shnong Pyndenborsora, kawei na ki shnong kiba don ha khappud bad ka ri Bangladesh ha ka janmiet jong ka 26tarik mynta u bnai.
Ha katei ka jingjia, haduh lai tylli ki ïing ki la julor jur bad kumba hynriew tylli pat ki la julor katto katne.
Watla ym shym la don kano kano ka jingjia ba sngewsih ha katei ka jingsyllad jong ka erïong hynrei ka jingduh pat kadei kaba la jur bha.
Kumta halor kane, na ka liang u MLA ka thaiñ, Bah HM Shangpliang mardor u la hiar sha katei ka thaiñ hynne ka step ban leit jngoh bad kynduh ïa kito ki longïing bad ruh ban noh jingïarap kyrpang na ka bynta ka jingdonkam ba kyrkieh jong ki.
“Mar ïa ïoh jingtip na u Rangbah Shnong, nga la bthah ïa u BDO ban phah jurip khnang ba kin ïoh ban leh ïa kaba donkam na ka liang ka sorkar,” ong u Bah HM Shangpliang haba kren hadien ba u la dep ban kynduh ïa kitei ki longiing.
Nalorkata, u la ïathuh ruh ba dalade hi u la ïohi ïa ka jingjulor na ka jingwan syllad jong katei ka eriong kaba pynlong ïa ki katto katne ki longiing ban duh noh ïa ka jaka sah jong ki.
U la ïathuh ruh ba kum u nongmihkhmat u la dep ruh ban noh jingïarap sha kitei ki longïing khnang ba kin lah ban maramot noh ïa ki iing ki sem jong ki.
