Shillong, Lber, 30: Ka tnat Telecommunications (DoT), Northeast License Service Area (LSA) ha ka sngi Balang ka la pynlong ïa ka jingïathir nia bad ban ai jingtip lyngba ka “Electromagnetic Radiations from Mobile Tower” ha Shillong khnang ba ki paidbah nongshong shnong kin dup tip kham bniah ha kaba pyntyllun shakhmat ïa ka kam Digital bad ban weng ïa ki jingsngewthuh bakla shaphang ka jingktah ka EMF kaba mih na ki Mobile Tower ïa ka koit ka khiah.
U DDG (Compliance) u A.K Jain, u la batai shaphang ka jingdonkam ïa ki Mobile Tower bad ka bynta jong ki kam Telecommunications ban pynbiang ïa ka jingïasoh kaba pura. U la kren shaphang ki jingsngewkhia jong ki briew da kaba ong, “na ka bynta ka roi ka par bad ka ïoh ka kot, ki kam Telecom ki long ka nongrim da kaba pynbiang ïa ka jingïasoh jong ki Mobile Tower ban kyntiew ïa ka jingïasoh hapdeng ki briew.”
U la ong ruh ba kam don kano kano ka jingktah ïa ka koit ka khiah jong ki briew haba ki ïadei bad ka Radiation kaba mih na ki Mobile Tower. U la pynshai ruh ba ka jingpyndonkam ïa ki jingshakri Telecom lyngba ki SIM card jong kito kiba pyntreikam ha kiwei kiwei ki ri ka long kaba be-ain katkum ka Indian Telegraph Act 1885 bad ba kito kiba leh ïa kane ki lah ban shah pynshitom katkum ki kyndon ka Indian Telegraph Act 1885 bad kiwei kiwei ki aiñ bad ki kyndon kiba ïadei bad kane. Kumta u la kyntu ïa ki briew ba kin ym pyndonkam ïa kum kine ki SIM card lane ki signal na kiwei kiwei ki ri haba ki don hapoh ka ri India.
U Sr. DDGDoT, Northeast LSA, Shillong u Ravi Goel u la pynshai shaphang ki kam jong ka NE LSA. U la ong ba ka World Health Organization (WHO) ka la kdew sha kumba 25,000 tylli ki jingthoh kiba la mih ha kylleng ka pyrthei ha kine ki 30 snem ba ladep bad ka la wad bniah na ki jingthoh ki stad saïan shuwa ban rai ba ka Radiation na ki Mobile Tower kam don kano kano ka jingktah ïa ka koit ka khiah jong ki briew.
Ha ka jingkren shaphang ka EMF bad ki kyndon, u K. Sri Krishna, DDG Mizoram u la ong “ka Sorkar India ka la batai shai shaphang ki kyndon kiba ïadei bad ki jingmih na ki mobile tower bad namar kane, ka India ka dei kawei na tang katto katne ki ri kiba don ki kyndon kiba pyrkhing bha ha kaba ïadei bad ki mobile tower. Ngi bud ïa ki kyndon kiba khlaiñ shiphew shah ban ïa kito kiba batai da ka ICNIRP bad kumba la bthah da ka WHO. Ka DoT ka peit man ka por ïa ka jingpynmih EMF na ki tower ha kylleng ka ri bad ka pynthikna ba ym don ba pynkheiñ ïa ki aiñ bad ki kyndon ha kaba ïadei bad kane. Baroh kiba ai jingshakri Telecom ki hap ban pynthikna ba ka Radiation na ki Mobile Tower (BTS) kam dei ban tam ïa u pud bad buh ïa ki briew ha ka jingma. Ka LSA ka pynlong ruh ïa ki audit jong ki jaka da kaba Test ïa ka Signal EMF ha ki jaka bapher bapher kiba jan ïa kine ki jaka trei. Ka long kaba donkam ban weng ïa ka jingsngewthuh bakla shaphang ka jingktah ka Electromagnetic Field Radiation (EMR) kaba mih na ki tyllong bapher bapher, khamtam ki Mobile BTS antenna bad ki mobile phone. Kumta, ki briew ki dei ban shaniah ïa ka jingshem katkum ka science ba ym don jingma na ka EMF radiation kaba mih na ki mobile tower.’’
U Senior Professor & Head Department jong ka Radiological Physics SMS Medical College & Hospitals, Jaipur u Dr Arun Chougule, uba la ïashim bynta ha kane ka seminar u la ong “ka EMF Radiation kaba mih na ki Mobile Tower Antenna bad ki Mobile Handset ka dei ka Low Non-ionizing RF/Electromagnetic Energy. Katkum ka jingwad bniah ki stad science halor ka jingktah ka Radiation na ki Mobile Tower ïa ka koit ka khiah, la lap ba ka Low Powered, Non-ionizing Radiation kaba mih na ki Mobile Tower kam ktah eiei ïa ka koit ka khiah jong ki briew. Kumta ka long kaba donkam bha ban pynsangeh ïa ka jingbatai bakla ha kane ka kam bad pyni ïa ka jingshisha. Ka long ruh kaba donkam ban sngewthuh ba kam don kano kano ka jingshem katkum ki stad saïan lane ki nongai jingsumar kaba pynksan ïa kane ka jingong pyrshah ïa ki mobile tower.’’
U Ravi Goel u la ong ba ka India ka donkam shuh shuh ïa ki tower ban pynurlong ïa ka Gati Shakti bad ka jingthmu Digital India jong ka Sorkar Pdeng. Katkum ka Mobile Economy Report 2022 ka GSMA, ki connection 5G kin tam ïa ka 1 billion ha u snem 2022 bad 2 billion shuwa u snem 2025. Shuwa ban kut u snem 2027, ka 5G kan don ka bynta kaba kumba 39% jong baroh ki Connection Mobile ha India, ha kaba la antad ba yn don kumba 500 million ngut ki briew kiba shim ïa kane, u la ong.
Ki jingsngewthuh bakla jong katto katne ki briew shaphang ka jingktah jong ka EMF Radiation kam dei ban pyndam ïa ka jingshisha kaba mih lyngba ka jingwad bniah ki stad saïan. Ki jingshem jong kine ki jingwad bniah ki pyni ba ym don kano kano ka jingktah ïa ka koit ka khiah namar ka EMF Radiation. Shuh shuh, phra tylli ki High Court jong ka India ki la rai kumne hi bad ki la ai ïa ki rai kiba thmu ban pynshai shaphang kine ki jingngeit bad ki jingbatai bakla kiba buh ïa ka roi ka par bad ka ïoh ka kot jong ka ri ha ka jingma. Kumta, ki briew ki dei ban sngew shngain ba kano kano ka jingkhuslai shaphang ki mobile tower ka long ka bym don nongrim.
La pyntip ba naduh u snem 2021-22 haduh mynta, ka NE LSA ka la test 2400 BTS naduh u Ïaiong 2021 haduh u Lber 2022 bad la shem ba baroh ki BTS ki bat ïa ki kyndon ka DoT halor ka EMF Radiation.
Baroh ki jingtip shaphang ki Mobile Tower ki don ha ka website jong ka DoT https://dot.gov.in/journey-emf bad ka portal http://tarangsanchar.gov.in/EMFportal, ha kaba ki briew ki lah ruh ban ai jingkyntu ban pynlong ka test ïa kano kano ka mobile tower hajan jong ki da kaba ai ka jingsiew kaba malu mala.
