Shah jied ka khynnah skul na Meghalaya ha ka jingïaphylliew jingmut bad u Narendra Modi

Shillong, Lber, 30: Ka Shilla Bishnab, ka samla kaba pule ha ka Class IX jong ka Jawahar Navodaya Vidyalaya, Mawphlang kan long kawei na ki samla pule na kane ka jylla Meghalaya ban ïoh ïashim bynta ha ka jingïaphylliew jingmut bad u Myntri Rangbahduh ka ri, u Narendra Modi ha ka bynta kaba san jong ka Pariksha Pe Charcha ka ban long ha ka 1 tarik, Ïaiong, 2022.
Ka Shilla Bishnab kaba dap da ka jingkmen namar kane ka kabu kaba shisien ha ka jingim ka la ong, “ngan ïaphylliew jingmut kumno ka National Education Policy 2020 kan pynkupbor ïa ki samla pule bad ïa ka imlang sahlang hi baroh kawei nalor kumno kane ka polisi kan prat lynti na ka bynta ka India kaba thymmai.”
U Myntri Rangbah duh, u Narendra Modi un ïaphylliew jingmut bad ki samla pule, ki nonghikai bad ki kmie ki kpa na kylleng ki ri ka pyrthei ha ka bynta kaban jong ka prokram Pariksha Pe Charcha.
Kane ka samla pule jong ka JNV Mawphlang ka dap da ka jingsngewkmen na ka bynta kane ka prokram bad ka la ong, “kan long ka burom kaba khraw bad ka jingsngew sarong ïa nga ban shah jied na ka bynta ka Charcha bad ban ïoh ïamir jingmut bad u Myntri Rangbahduh ka ri.”
Ka Pariksha Pe Charcha ka dei ka prokram kaba ju pynlong shisien shisnem ha kaba u Myntri Rangbahduh ka ri u jubab ïa ki jingkylli kiba ïadei bad ka jingkhuslai jingmut namar ki eksamin bad kiwei kiwei ki bynta ba ïadei bad kane ba ki samla pule ki buh jingkylli ha kane ka prokram kaba pyni Live ha Doordarshan (DD National, DD News, DD India), ki Radio Channel, ki TV Channel, Digital Media kynthup ki YouTube Channel jong ka EduMinofIndia, narendramodi, pmoindia, pibindia, Doordarshan National, MyGovIndia, DDNews, RajyaSabha TV, Swayam Prabha.
U Secretary jong ka tnat Pule puthi ka Sorkar Meghalaya, u Ambrose Ch. Marak u la pynpaw ka jingkyrmen ba kane kan long ka khyllipmat kaba khraw na ka bynta ka samla pule na Meghalaya ban ïoh ïamir jingmut bad u Myntri Rangbahduh, da kaba pyntip ruh ba ka tnat ka la pynkhreh na ka bynta ki samla pule bad ki nonghikai ha ka jylla ban peit ïa kane ka prokram.
Ka bynta ba san jong kane ka prokram kan long ha New Delhi ha ka rukom ïaphylliew jingmut kaba long ha Talkatora Stadium ha ka por 11:00 baje mynstep.
Da ki klur ngut ki samla pule, ki nonghikai bad ki kmie ki kpa na ka ri bad nabar ka ri India kin sa ïashim bynta ha kane ka prokram.
Ladep jied ruh ïa ki samla pule, ki nonghikai bad ki kmie ki kpa ki ban kylli jingkylli ïa u Myntri Rangbahduh halor ka nongrim jong ka jingïakop thoh ba la pynlong Online halor ki phang bapher bapher. Ïa ka jingïakop thoh la pynlong naduh 28 tarik Nohprah 2021 haduh 3 tarik Rymphang, 2022 lyngba ka rynsan MyGov. Palat 15.7 lak ki nongïashim bynta ki la pynrung kyrteng mynta u snem na ka bynta ka jingïakop thoh jingthoh.
Ki nongïashim bynta kiba la shah jied lyngba ki jingïakop ha ka MyGov kin ïoh ka Certificcate of Appreciation bad ka Pariksha Pe Charcha kaba kyrpang ka kynthup ïa ka kot Exam Warriors, ba la thoh da u Myntri Rangbah duh ka ri.