Shillong, Lber 30 : U MLA ka Mylliem ba dei ruh u Myntri ka tnad C&RD ka sorkar jylla, Bah Hamlet Dohling ha ka sngi Balang u la ong ba lada ma u kum u MLA um leh mano pat kiban trei na ka bynta ban wanrah ïa ki kam pynroi kiba pher bapher ha ki shnong ki thaw jong ka Mylliem constituency.
Ïa kane, u Bah Hamlet u la kren ha ka jingïalang plie ïa ki ar tyli ki projek ha Nongumlong, Upper Shillong ba kynthup ïa ka iing skul jong ka Nongumlong Govt. Lower Primary School ba la sdang ban tei ha ka jingmang kaba 37lak tyngka bad ruh ïa ka Community Hall jong ka shnong kaba la dep tei ha ka jinglut kaba 10 lak tyngka.
Haba kren ha kane ka jingïalang kaba la donlang naduh u BDO ka Mylliem, Bah PT Passah, nangta ka Headmistress jong ka Nongumlong Govt. LP School, Kong Mon Tron, ki dkhot jong ka Managing Committee, ki nongïalam shnong, ki nonghikai bad khamtam ki khynnah skul bad ki kmie ki kpa, u MLA u la ïai ban ba u dei u briew u bym ju sngewtynnad ban shu plie tang u mawnongrim lada ym lah ban sdang ïa ka kam.
“Peit hangne, mawnongrim dang plie hynrei ka jingtei ïa ka iing skul ka la ïaid shaid shaid. Kane kadei ka jingpyrshang ban wanrah ïa ka rukom treikam kaba thymmai ym ban shu kut tang ha ka buh mawnongrim khlem sdang shuh lano lano ruh ïa ka kam,” u la ong.
Shwa kane, u MLA u la ai ruh ka jingïaroh ïa ki bor shnong kiba la kyrshan borbah ïa katei ka skul haduh ba ka la kiew stet kumba ka long mynta. U la kular ruh ba mardor un sa pynpoi ïa ki kor computer na ka bynta ka jingdonkam jong katei ka skul.
Haba kren pat halor ka jingplie ïa ka Iing Dorbar jong ka shnong, u MLA u la ong ba ha ka por ba u jop, u lap ba ki Iing Dorbar ter ter naduh Lummawbah haduh Mylliem kidei ki bym ïahap satia tang ban long Dorbar ruh. “Hynrei ha ine i khyndiat por ba nga jop nga la lah ban pynïoh bun tylli ki Iing Dorbar ban pynsuk ïa ki nongïalam shnong ba kin ïa kren bad ïatai halor kiba bun ki phang kiba ïadei na ka bynta ka bha ka miat jong ka shnong ka thaw,” u la bynrap shuh shuh.
Kiba bun ki nongkren ha katei ka sngi, ki la pynpaw ïa ka jingkmen kaba khraw na ka bynta ka rukom treikam kaba stet, kaba shai bad kaba ïaid ryngkat ryngkat bad ki nongïalam shnong.
